Bu gecə Sumqayıta yağan güclü qar fəsadlara yol açıb. Çovğunla müşayət olunan qar  Sumqayıtdan Bakıya iş dalınca gedən insanlara ciddi problemlər yaradıb. Bundan istifadə edən taksi sürücüləri qiyməti 10 manata qaldırıblar.  Bakıda çalışan insanların əksəriyyəti mənizlbaşına çata bilməyib.  Hava şəraitinin ciddi şəkildə dəyişməsi şəhərin mikrorayon və məhələllərində enerji verilişinin verilməsində də problemlərə yol açıb. Belə ki, Sumqayıtın əksər hissəsi işıqsız qalıb.  Bununla yanaşı, sərnişindaşıma xidməti ilə məşğul olan  marşurut avtobuslarının hərəkətində də fəsadlar yaranıb. İnsanlar küçələrdə qalıb. Avtomobillərin əksəriyyəti qara təslim olub. Əsasən şəhərin mərkəzi hissələrinin qardan təmizlənməsi üçün texnikalar cəlb edilib.

   Apardığımız müşahidələr onu da göstərdi ki, qarlı çovğunlu hava şəhər sakinləri arasında təşvişə səbəb olub. İnsanlar ərzaq tədarükü görməyə başlayıb.  Şəhər sakinlərinin əksəriyyəti çörək və un məmulatları alaraq özlərinə ərzaq ehtiyatı yığır.  Söhbətləşdiyimiz sakinlər deyirlər ki, hava şəraitinin kəskin şəkildə dəyişməsi onlar da narahatlıq yaradıb və məhz bu səbəbdən də çörək və un məmulatlarının gündəlik tələbatlarından daha çox alamağa qərar veriblər. 

Bəs məktəblərdə vəziyyət necədir?

Bununla bağlı  Sumqayıt şəhər təhsil şöbəsinin müdir əvəzi Vaqif Ələkbərovla əlaqə saxladıq. V. Ələkbəov "Xeberle.com"-a bildirdi ki, hava şəraitinin kəskin dəyişməsi tədris prosesinə təsir göstərməyib: "Tədris prosesi ilə bağlı hansısa problemlərr yaranmayıb. Bütün məktəblərdə dərs prosesində narahatçılıq yoxdur"

Onu da qeyd edək ki,  idarə və müəssisələrin qarşısına qar topasının yığılması insanların hərəkətində problemlər  yaradıb. Müşahidələrimiz onu göstərdi ki, Sumqayıt şəhər təhsil şöbəsinin, eləcə də  Nəriman Nərimanov adına Mədəniyyət Evinin kollektivi qarın təmizlənməsi prosesində intensiv iştirak edir. Hər iki müəssisənin kollektivi çalışdıqları idarənin ətrafını qardan təmizləyiblər.

Hazırda da Sumqayıtda yağıntılı hava davam edir.

Ramil Yaquboğlu

Xeberle.com