Ən çox sevilən fəsillərdən biri də qışdır. Qar isə bu fəslin ən sevilən hadisəsidir. Uşaqlar, boyüklər - hər kəs qarı çox sevir. Bir anlıq insan uşaqlaşır, xoşbəxt olur. Hər tərəfin bəmbəyaz olması göz oxşayır. Lakin… Lakin bu o zaman insanın ürəyincə olur ki, problemlərdən uzaq ola bilsin. Təəssüf ki, bu, Azərbaycanda, Sumqayıtda mümkünsüzlük dərəcəsindədir. Çünki qarın yağması ilə demək olar ki, bütün “kabuslar” başlayır: işıq, qaz, su, nəqliyyat və sair problemlər üzə çıxır, süni bahalaşmalar yaranır. Maraqlıdır, bu qar sumqayıtlılara necə təsir etdi, onların həyatında, məişətində hansı çətinlikləri yaratdı? Bu səbəbdən də şəhər sakinlərinin fikirlərini öyrəndik.

-         Sizcə, bu qar sumqayıtlılara hansı problemləri bəxş etməkdədir?

-         Hansısa sahədə süni qiymət artımı, yaxud nəyinsə qıtlığını müşahidə edirsinizmi?

Sevda Əkrəmqızı, 1-ci mkr., bina 45 v

-         Yollar pis vəziyyətdədir. Nə normal işıq, nə də qaz var. Bizdə su da olmur. İndi də yoxdur.

Hüseynova Arzu, 47-ci məh., bina 159/1

-         Bu qar şəhər sakinlərinə elektrik problemlərini yaşatdı, nə az,nə çox, düz yarım sutka... Eyni zamanda, çörək qıtlığı yaşandı... Şəhərimizin mini marketlərində hər vaxt çörək tapmaq çətinləşdi. Amma süni qiymət artımına rast gəlməmişəm.

Aydın Muradlı, 17-ci mkr., bina 67

-         Bir yerdən digər bir yerə getmək üçün marşrut gözləmişəm, amma sonradan bilmişəm ki, marşrutlar yoxdur. Dünən şəhərin 17-ci mikrorayonu çörəksiz qaldi. Qar yağan gecə səhərə qədər işıqsız qaldıq. Qar yağıb hər yan ağappaq olsa da, indi bilinəcək Sumqayıtın kanalizasiya sisteminin işləməsi. Ağ qar yağsa da, deyəsən, ağ qarın qara palçığında üzəcəyik.

İsmayıl Kərimov, 21-ci mkr., fərdi həyət evi

-         Taksi sürücüləri yenə qansız davrandılar. Ən böyük problem yol problem oldu. Kommunikasiya isə həmişəki kimi işıq, qaz, su problem yaratdı.

Piriyev Süleyman, 17-ci mkr., bina 60

-         Taksilərdə qiymət artımı hiss elədim. 2-3-ü bu vəziyyətdən istifadə elədi, şahidiyəm. Adamın birini 10-15 AZN-dən aparırdılar. Çörəkdə isə qıtlıq oldu.

Elçin Həsənov, İnşaatçılar qəsəbəsi,bina 3916

-         Sumqayıtda bir neçə saatlıq qar şəhəri tamamilə iflic etdi. Qaz, su və işıq kəsildi. Şəhərin İnşaatçılar qəsəbəsi daxil olmaqla, 90% məhəllələrdə mağazalarda çörək yox idi. Çörək maşınları qarı bəhanə edib dükanlara çorək gətirmədi. 10A, 6A, 7 saylı marşrutlar da daxil olmaqla, heç bir marşrut xəttə çıxmadı və buna görə də insanlar küçələrdə qalmalı oldular.

Nuriyev Əli, 48-ci məh., ev 7

-         Bu qar haqqında bir çox şey demək olar. Yəni nəqliyyat marşrutların əksəriyyəti işləmirdi, şəhərdə bircə az çox 7 saylı marşrut işləyirdi. Bu da ki, acınacaqlı haldır, yollarda qəzalar və sair. Sonda demək istəyirəm ki, hər qışda olmadığı kimi, bu qış da yaman soyuqlar düşüb.

Fuad Mammadzadə, 42-ci məhəllə, ev1

-         Düzü, hələlik qiymət artımı ilə rastlaşmamışam. Amma eşitdiyimə görə, taksilər qiymətləri artırıblar. Bir də dükanlarda çörək qıtlığı idi. Problemlər çoxdur, məsələn, təmizlənməmiş yollarla, işıqların söndürülməsi ilə bağlı...

Ömürtay Şükürlü, Corat qəs., 33v

-         İki gün işıqlarımız yanmadı. Taksilərdə gediş haqqı bahalaşdı. Çörək çətin tapıldı.

Tural Həsənov, 4-cü mkr., bina14/21

-         Mənim üçün heç bir problem olmadı. Hər şey super oldu.

Fatimə Aslanova, 17-ci mkr., bina 67

-         Çörək qıtlığı müşahidə olundu. Marşrut tapılmadı. Taksilərin qiyməti çox baha idi.

Emil Maqalov, 17 mik-on, 44

-         Birinci növbədə işıq, su, qaz. Müəllimlərimizin QUL əvəzinə işlədilməsi. Nəqliyyatın 5-10 dəfə azalması. Və şəhər rəhbərliyinin fəaliyyətsizliyi.

Tərxan Paşazadə, 10-cu mkr., bina 3

-         Bu gün (dünən – red.) Sumqayıtdan Bakıya - işə çox rahat gedib-gəldim. Hətta həmişə 1-2 manata olan taksilər bu gün 50 qəpiyə gedirdi. Yollarda sürət minimum 100-120 km/saat idi. Heç bir yolda qar-buz görmədim. Hər yer təmizlənmişdi... Və nəhayət, yuxudan ayılanda isə artıq suyumuz kəsilmiş, qazımız azalmış, işığımız isə sönmüşdü; yollardan və nəqliyyatdan isə danışmağa dəyməzdi. Çünki nə yol yox idi, nə də nəqliyyat. Ona görə də bu gün işə gedə bilmədim.

Amil Almasov, 16-cı mkr., fərdi həyət evi

-         Gecə işıqlar söndü. Su boruları donduğu üçün partladı, su da yoxdur.

Qabil İsmayılov, 10-cu mkr., ev 40

-         Qar Sumqayıt camaatına iki cür təəssürat bağışladı; bunlardan birincisi qarın gətirdiyi problemlər idi. Elektrik enerjisinin verilişində fasilələr yarandı, çörək qıtlığı dərhal özünü hiss etdirdi. İkinci təəssürat isə Sumqayıt uşaqlarına, körpələrə bəxş etdiyi sevinc hissi idi. Uşaqlar, eləcə də böyüklər qartopu oynadılar, qaradmı düzəltdilər və sair.

Şəfa İsmayılova, 48-ci məhəllə, bina 5v

-         Bizim binada bu soyuqda nə istilik sistemi, nə də qaz olmadı. Çörək qıtlığı oldu. Yollar isə təmizlənmədiyi üçün qoca, qadın, uşaq yıxılıb bir yerlərini qırırlar.

Xudiyeva Şəhla, 17 ci mkr., ev 46

-         Sualınıza cavab olaraq bildirirəm ki, qar yağmamış elektrik xətti kəsildi. İki gündür 8-10 saat işıqlar sönülü olub. Qaz həddindən artıq çox zəif gəlir. Yollar təmizlənmir, buz qalıb, avtomobillər təhlükəli vəziyyətdə hərəkət edir, hətta avtobuslar işləmədi, şəhərdə cəmi 2-3 avtobus işlədi.

Təqdim etdi: Türkan Heydərova, Xeberle.com