"Lift-servis” birliyi Sumqayıtda 1989-cu ildən fəaliyyət göstərir. Elə yaradıldığı ildən birliyin direktoru Cümşüd İsmiyevdir. O, Sumqayıtın kürsüdə saç ağardan uzunömürlü məmurlarındandır.

HAŞİYƏ: 1956-cı ildə Kürdəmir rayonunda anadan olan C.İsmiyev əmək fəaliyyətinə 18 yaşında Kürdəmir rayon taxıl tədarükü kombinatında elektrik çilingəri işləyərək başlayıb. Elə həmin illərdə Azərbaycan Neft Kimya Universitetinin energetika fakültəsinə daxil olan C.İsmiyev ali təhsilini axşam növbəsində oxuyuraq eyni zamanda Üzvi Sintez zavodunda poliefir sexində növbətçi elektrik işinə də davam edir. Ali təhsilini bitirdikdən sonra 1974-1976-cı illərdə Almaniyada hərbi xidmətdə olur. Hərbi xidmətini başa vurduqdan sonra əmək fəaliyyətinə evtikmə kombinatında davam etdirir. İri panelli evtikmə zavodunun işə buraxılmasında böyük əməyi olan C.İsmiyev daha sonra yerli sənaye kombinatının fabrikində direktor müavini vəzifəsində çalışır. Daha sonra isə Kompressorlar zavodunun dövlət qəbulu komissiyasında və yığma sexində rəis kimi fəaliyyət göstərir. 1989-cu ildən isə Sumqayıt "Lift-servis" Birliyinin direktorudur.

Cümşüd İsmiyevin lift sahəsinə gəlişi də maraqlı olub:

"Əvvəl Gəncə şəhərinin lift təsərrüfatının tabeliyində olan sahə kimi fəaliyyət göstərən müəssisə istismardan çıxan hissələrinin təmirində çətinlik çəkirdi, ən sadə detalları təmir üçün Bakıya və digər rayonlara göndərirdilər. İlk dəfə lift sahəsinə gəlişim xarab olan liftlərin mühərriklərinin sarınması üçün olub. Daha sonra 1989-cu ildə Sumqayıt şəhər İcraiyyə komitəsinin tərkibində indiki idarəni yaratdıq. Və liftlərin alınması, onların quraşdırılması, təmiri, istismar olunmasını bir yerdə toplayaraq idarəmizi qurduq və o vaxtdan da fəaliyyət göstəririk", - deyə direktor söyləyib.

Direktor "Özünüz də liftdə qalmısınız?" sualını təbəssümlə qarşılayaraq belə cavab verib:

"Bəli, lap çoxdan olub belə hadisə. Sumqayıtda lift olan binalardan birində yaşayırdım. Çox qısa müddətliyinə lift xarab oldu, zəng etdim, gəlib lifti açdılar. Lakin indiki dövrdə liftlərdə qalmaq probleminə çox nadir hallarda rast gəlmək olar. Ya insanların öz məsuliyyətsizliklərindən, ya da ki, mərkəzi qaydada elektrik kəsilərsə, liftdə qalma halları baş verə bilər. Bu zaman dispetçer xidmətimizin işçi qüvvəsi qısa zaman ərzində bağlı liftlərdə qalan insanların köməyinə gəlir".

Əsas hobbisi ov etmək olan birlik direktoru deyir ki, əvvəllər bu işlə daha çox məşğul olurdu. İndi isə o, vaxt azlığından sevimli hobbisinə vaxt tapmır. C.İsmiyev 30 il müddətində rəhbərlik etdiyi qurumun bir sıra nailiyyət əldə etdiyini bildirib:

"Direktor olduğum bu 30 il müddətində idarəmizin və mənim əldə etdiyimiz ən böyük uğur, ən önəmlisi isə ölkəmizdə ilk dəfə pilot layihə olaraq Sumqayıtda lift xidmətinin internetlə intellektual idarəetmə sistemi yaradılmasıdır.

Ötən ildən Azərbaycanda ilk dəfə olaraq Sumqayıt şəhərində pilot lahiyə kimi lift xidmətinin intellektual idarəetmə sistemi yaradılıb.Yeni yaradılan sistem vasitəsi ilə əhaliyə göstəriləcək xidmətlərin keyfiyyəti daha da yaxşılaşdırılıb. Önümüzdəki illərdə bütün lift olan binalar intellektual idarəetmə sisteminə keçəcək".

Qeyd edək ki, C.İsmiyev 2009-cu ildə Sumqayıt şəhərinin 60 illiyi münasibətilə şəhərin sosial-iqtisadi inkişafında xidmətləri görə "Tərəqqi” medalı ilə təltif edilib. Həmçinin də,bir neçə dəfə fəxri fərmanlarla təltif olunub.

1 oğlu, 1 qızı və 4 nəvəsi var.

Xədicə Səxavətqızı

Xeberle.com