2009-2019-cu illər ərzində Prezidentin ehtiyat fondundan Sumqayıt şəhəri üçün ayrılan vəsait haqqında qısa bir araşdırma etmişdik. Araşdırmanın nəticəsi olaraq ayrılan 107.7 milyon manat vəsaitin hesabına şəhərdə görülən işlərinin sakinləri nə dərəcədə qane edib etməməsi haqda "Sumqayıt Rəsmi Səhifə” adlı facebook səhifəsində sorğu keçirdik. (sorğunun linki: https://www.facebook.com/sumqayitresmisehife/photos/a.256099507869470/1932339760245428/?type=3&theater)
Onlayn sorğuda iştirak edən 170 respondentin (02.12.2019-cu il tarixii üçün) əksəriyyəti "İndiyədək Sumqayıta ayrılan pullar hesabına bütün şəhəri istiliklə təmin etmək olardı” fikrindədir. Təbii ki, fəslə uyğun olaraq, havaların soyuq keçməsi sorğuda iştirak edənlərin çoxunun məhz bu yöndə olan problemlərə üstünlük verməsinə səbəb olub. Eyni zamanda məhəllədaxili yolların və işıqlandırmanın bərbad vəziyyətdə olması, Yaşıldərə və Kotec yaşayış massivlərində isə ümumiyyətlə kanalizasiya sistemi və həmçinin də yeni asfaltlanan mərkəzi küçələrdə yağış lyuklarının olmaması da əhalini narahat edən problemlər siyahısındadır. Respondentlərin bir qismi isə Sumqayıtda hələ də Şərq bazarı adlanan ərazi və əraziyə yaxın yolların bərbad vəziyyətindən narazıdırlar. Həmçinin bəzi mikrorayonlarda su problemi, dəmiryol vağzalına gedən küçədə piyada səkisinin, məhəllələrə yaxın ərazilərdə uşaq oyun meydançalarının və yeni qurulan dənizkənarı bulvarda gəzinti gəmisinin hələ də olmaması da bitib tükənməyən istək və problemlər siyahısında yer alır.
Qeyd edək ki, Xeberle.com sözügedən səhifədə mütəmadi olaraq sosial, iqtisadi, mədəni sahələri əhatə edən sorğular keçirir.
Xədicə Səxavətqızı
Xeberle.com
Xəbərdən istifadə edərkən istinad etmək vacibdir.
