Şəhid general-mayorumuz Polad Həşimovun 32 illik dostu, sinif yoldaşı Rövşən Məmmədov mərhumla bağlı xatirələrini Xeberle.com-la bölüşüb.

Qəhrəməncasına həlak olan generalımızın sinif yoldaşı onun danışmağın çox çətin və məsuliyyətli olduğunu, Polad Həşimovun vətənini, millətini, xalqını, dövlətçilik prinsiplərini hər şeydən üstün tutan bir zabit, insan olduğunu qeyd edib:

"Polad fəxr ediləsi, qürur duyulası Azərbaycan vətəndaşı, Vətən övladı idi. Bu gün sözün həqiqi mənasında barəsində danışmaq mənim üçün çox çətindir. Polad kimi əziz dostu, qardaşı, 32 illik sirdaşı itirmək mənim üçün xeyli dərəcədə ağırdır. Polad ömrünün 30 ilini vətənin müdafiəsinə  həsr etmişdi. Cəbhə bölgəsində xidmət edən zabitlərdən olub. 2016- cı ilin aprel döyüşlərində göstərdiyi qəhrəmanlıq və şücaət tarixə yazılası bir xidmətdir. Cənab prezidentin fərmanı ilə aprel döyüşlərindən sonra Talış istiqamətində göstərdiyi qəhrəmanlıqlara görə  "İgidliyə Görə" medalı ilə təltif edilmişdir. O, bundan sonra da dostlarının qəlbində yaşayacaq. Polad kimi dostumuz olduğuna görə fəxr edirik. Düşmən sevinməsin, əksinə bilsin ki, biz bir ölüb min dirilirik.

Polad kimi minlərlə vətənini sevən, vətən uğrunda canını fəda edəcək oğullar var. Poladın ruhu şad olacaq. Bu gün şəhid olan oğulların ruhu o zaman rahat olacaq ki, torpaqlarımız düşmən tapdağından azad olunacaq. Cənab Ali Baş Komandan İlham Əliyevin ətrafında sıx birləşərək, işğal altında olan torpaqlarımızı tezliklə azad edəcəyik və düşmənə olan nifrətimizi bir daha göstərəcəyik. Ruhun şad olsun qardaşım, Şəhidlik zirvəsindəsən. Əzizlərinə, ailənə və bütün dostlarımıza səbr diləyirəm!”