9 Fevral 2020 AR Milli Məclisinə keçiriləcək növbədənkənar seçkilərdə 42 Saylı Sumqayıt İkinci Seçki Dairəsinin müstəqil namizədi gənc ictimai-siyasi fəal və müstəqil jurnalist Nərmin Şamilova təbliğat kampaniyasının əsas hissəsi olan seçicilərlə olan görüşlərini 1-mkr ərazisində yekunlaşdırıb. Bundan öncə daha çox fərdi görüşlərə üstünlük versə də, sonuncu təqdimatını seçicilərlə 1-ci mkr ərazisində yerləşən "xeyir-şər" evində keçirib. Xanım namizəd qeyd edir ki, bu seçkilərin növbədənkənar olması və zamanın məhdudluğu seçki prosesinin effektivliyinə təsir edir, bu üzdən də strategiyası və təbliğatını fərqli şəkildə qurmağa məcbur olur:

 

"2014/15-ci illərdə daha çox səfər etdiyim Avropa ölkəsi olan Litva Respublikasında seçki təbliğatına dair kampaniyada təcrübə keçmiş, yaxın dostum olan şəhər merinin yerli seçkidəki, digər diplomat kolleqa və dostlarımın isə parlament seçkisindəki maraqlı təbliğat üsullarını, metodlarını qeyd etdim, bu maraqlı təcrübəni ölkəmizdə də tətbiq edə bilərəm deyə düşündüm. Lakin nə 2015-ci il, nə də 2020-ci ildə buna imkan olmadı. Seçkilərin növbədənkənar olması və zaman azlığı strategiya və resurslarimiza təsir etdi. Bəli, bu seçkidə maliyyə resursu çox olanlar effektiv kampaniya qura bildilər, daha çox diqqət qazandılar. Lakin mən də az resurslarımın fonunda fərqli təbliğat aparan namizədəm. Mən sübut etməyə çalışıram ki, faydalı ola bilmək üçün kiçik addımlar və təşəbbüslər kifayətdir. Millətin vəkili elə bu yoldan yürüməlidir: çətinliklər, imkansızlıqlara rəğmən. O halda vətəndaşını da, seçicisini də daha yaxşı anlaya bilər, dəstək olar. Hədiyyələr, möhtəşəm kampaniya və reklamlar, təqdimatlar... bütün bunlar müstəqil namizəd üçün xeyli xərc, vəsait tələb edir və bunlar seçiciyə nəsə vəd etmir əslində. Önəmli olan çağırışlardır, seçicilərlə ünsiyyətdir, dialoqlardir. Vətəndaşlara qayğı lazımdır, onları dinləmək lazımdır. Görüşümüzə hər kəsi dəvət etdik və bunu formalliq xətrinə tərtib etmədik. Bizim görüş bir debatı xatırlatdı. Qızğın müzakirələr oldu, suallar verildi, təşəbbüslər irəli sürüldü, tələblər qoyuldu. Sakinlər artıq narazılıqlarını dilə gətirə və problemin səbəbi və həllini aydın şəkildə qeyd edə bilirlər, hüquqlarını tələb edirlər. Bu o deməkdir ki, artıq bir vətəndaş bloku var, təşəbbüskarlar var, sadəcə bu kimi görüşlər mütəmadi olmalı, sakinlər ünsiyyətdə olub bir-birini tanımalı, haqqlarına sahib çıxmalıdırlar. Bu halda millət vəkili də məsələləri ictimailəsdirməli, prosesdəki səlahiyyətli bir şəxs olmalıdır: dövlət və vətəndaş arasındakı rabitəni tənzimləyə bilmək üçün. Bütün bunlar zəncirvari bir əlaqədə olmalıdır, əks halda tarazlıq pozulur. Vətəndaş dövlətindən narazı qalır haqlı olaraq, dövlət də vətəndaşlarının səsini eşidə bilmir. Millət vəkili bütün bu məsuliyyəti, səlahiyyəti bilməli, dərk etməlidir.

Bu seçkilərdə bir fəallıq var, lakin bu daha çox namizədlik və müşahidəçiliklə bağlıdır. Maraqlı odur ki, namizəd olanların sayı seçici olmaq istəyənlərin sayından çoxdur. Deməli bir fərq, inkişaf var. İndi əsas məsələ seçicini seçkiyə həvəsləndirməkdir, etimadını qazanmaqdır. Bu seçki prosesində mən tam yalnız yürüdüm. Lakin seçki təbliğatında qazandığım yeni dostlar var, mən artıq bir çox seçicimlə həm də dostam. Bizi bir-birimizə bağlayan ortaq dəyərlər, sadəliyimiz, diqqət və qayğı oldu. İnsanlığa qayğı gərəkdir, sevgi gərəkdir. Seçki özü də bir mədəniyyətdir. Hər işi sevərək görmək lazımdır, həvəslə, səbrlə.

Elə həmkarlarımız var ki, "Təbliğatını niyə belə aparırsan, marketinqin zəifdir" deyirlər.. Siyasətin, eləcə də xalqa xidmətin nə olduğunu hələ dərk etmədikləri üçün bunu deyirlər. Seçkinin əsas hədəfi seçicidir, vətəndaşdır, pulla təşkil etilən şou deyil. Təbii ki, resurs çoxdursa, maraqlı kampaniya da aparmaq olar. Lakin insanlara mənəvi qayğı, diqqət lazım. Bunu bacarmırıqsa, bizdən nə millətin vəkili, nə də uğurlu bir siyasətçi olar.

Bu seçki bizə sadə və yeni dostlar qazandırdı. Bəli, seçici bizim ən yaxın dostumuzdur. Pafossuz, filan..

Həmkar və opponentlərimə uğurlar arzu edirəm, haqlı olan qazansın! Seçiləcəyim, qələbəni qazanacağım təqdirdə onları da yanımda, komandamda görmək istəyirəm, birlik üçün, dövlət üçün, xalq üçün. Digər namizədlərdən biri seçkinin qalibi olsa yenə də yanlarindayam. Təkliflərim, təşəbbüslərimlə birgə bir ictimai fəal, sağlam bir vətəndaş kimi. Zatən güc birlikdir. Mən də sizin SƏSinizəm, istər bir millət vəkili, istər bir namizəd, istərsə də bir vətəndaş kimi...

 

 

 

 

 

 

 

 

 

Xəbərdən istifadə edərkən istinad etmək vacibdir.