Hər bir şəhərin gözəlliklərindən biri də onun tarixi abidələri, heykəlləridir. Doğma Sumqayıtımızda da bir çox tanınmış insanların heykəlləri, eyni zamanda tematik abidələr var.
Bunlara misal olaraq, Nizami Gəncəvi, Nəsimi, Heydər Əliyev, Cəfər Cabbarlının heykəlləri, "Göyərçin” və "Qağayı" abidəsi, Üzeyir Hacıbəyovun abidə kompleksi, Şəhidlər Xiyabanında "Alov məşəli” abidəsi, Böyük Vətən müharibəsində həlak olanların xatirəsinə həsr olunmuş abidə və sair göstərmək olar. Son dönəmlərdə dənizkənarı bulvar ərazisində yenidənqurma işləri aparılarkən orada da kiçik heykəlçiklər qoyulub ki, bu da öz növbəsində şəhərimizə gələn qonaqlar və yerli əhali tərəfindən maraqla qarşılanır.
Lakin ölkəmizdə, həmçinin Sumqayıtda da elə dəyərli şəxsiyyətlər yaşayıblar ki, onların da xatirələrinin əbədiləşdirilməsi gözəl olardı.
Bəs sumqayıtlılar necə düşünür, şəhərimizdə kimin heykəlinin ucaldılması daha sevindirici olardı?
Elə bu sualla da Xeberle.com-un "Sumqayıt Rəsmi Səhifə” adlı facebook və instaqram sosial hesablarında sorğu keçirdik.
Respondentlər müxtəlif cavablar versələr də, təkrar cavab sayına görə ardıcıllığı sizə təqdim edirik
1. Məhəmməd Əmin Rəsulzadə
2. Mübariz İbrahimov
3. Mehdi Hüseynzadə
4. Raquf Orucov
5. Hacı Zeynalabdin Tağıyev
6. "Göyərçin” abidəsinin müəllifi Vaqif Nəzirli
Maraqlıdır ki, respondentlərin bəzisi yaşayan dünyaşöhrətli idmançılarımız, ölkəmizin adını beynəlxalq yarışlarda layiqincə təmsil edən 2 şəxs - karatenin "brilyantı” Rəfael Agayevlə, beynəlxalq qrossmeysterimiz Şəhriyar Məmmədyarovla bağlı abidələrin olmasını arzulayırlar.
Bax belə. Yəqin ki, sorğunun nəticəsi barədə ümumi təəssürat məlum oldu. Etiraf edək ki, hələ də Sumqayıtda milli tariximizin parlaq səhifələrini özündə əks etdirən cəlbedici monumental abidə yoxdur. Hesab edirik ki, qəhrəmanlığımızı tərənnüm edən, keçmişimizi, xüsusən qan yaddaşımızı nümayiş etdirən möhtəşəm abidələr olmalı, müstəqilliyimizin əldə olunması uğurunda mübarizəmiz, verdiyimiz itkilər əbədiləşdirilməlidir.
Yeri gəlmişkən, eləcə də Sumqayıtı qurub-yaradan zəhmətkeş insanlara da ümumi abidə -kompleks yaradılsa, sakinlərin ürəyincə olardı.
Xədicə Səxavət
Xeberle.com
Xəbərdən istifadə edərkən istinad etmək vacibdir.
