Məlum olduğu kimi, şəhərimizin yeganə universiteti Sumqayıt Dövlət Universitetinin infrastrukturu, maddi – texniki bazası müasir standartlar səviyyəsində deyil. Doğrudur, son dövrlərdə universitetə, onun binasına bir az əl gəzdirilib, ancaq fakt odur ki, bu təhsil ocağının hər iki binası köhnədir, labaratoriyalar yetərincə təchiz olunmuş deyil, idman, əlavə məşğələlər üçün infrastruktur və baza ölkənin aparıcı universitetləri ilə müqayisədə aşağıdır.
Məhz bu problemlərin həlli istiqamətində son dövrlərdə bir neçə dəfə yüksək səviyyədə müzakirələrə də şahidlik etmişik.
Hələ Universitetin 50 illik yubileyi ilə bağlı keçirilən tədbirdə - 2012-ci ilin sentyabrında təhsil naziri Misir Mərdənov, Sumqayıt şəhər icra başçısı Eldar Əzizov və universitetin o vaxtı rektoru Nadir Qəhrəmanovun müzakirələrindən sonra tədbirdə yeni korpusun tikintisi ilə bağlı açıqlama verilmişdi.
Bir il bundan öncə 2013-cü ilin dekabrında isə Sumqayıt Dövlət Universitetində rəhbər dəyişikliyi edildi. Bakı Dövlət Universitetinin prorektoru və Azərbaycan Türkmənistanda səfiri olmuş Elxan Hüseynov əvvəlcə rektorəvəzi, daha sonra isə rektor təyin edildi. Universitetinin yeni korpusunun tikintisi həmin vaxt da gündəliyə çıxdı. Biz bu barədə hələ bir neçə ay sonra - 2014-cü ilin ortalarında biləcəkdik: Universitetin prorektoru Nizami Namazov "168 saat”a müsahibəsində yeni korpusun tikintisi ilə bağlı məsələnin dövlət başçısı səviyyəsində müzakirə olunduğunu bildirmişdi. Sitat: "Möhtərəm prezident İlham Əliyev universitetin yeni korpusunun tikintisi ilə bağlı tapşırıq verib”.
Prorektor həmin müsahibədə yeni korpusun tikintisinin növbəti tədris ilindən etibarən başlanacağını bildirmişdi.
Daha sonra nazir Mikayıl Cabbarov da Sumqayıt Dövlət Universitetində olub, vəziyyətlə tanış olmuşdu.
Universitetlə əlaqə saxlayıb, yeni korpusun tikintisinin gecikmə səbəbi ilə maraqlandıq. Prorektor Nizami Namazov bildirdi ki, yeni korpusun tikintisinin 2015/2016-cı tədris ilində başlanması nəzərdə tutulub. Layihələndirmə işləri, onun müzakirəsi, təsdiqi bir az vaxt alan işdir. Layihə kollektivimizə də təqdim olunub, baxıb, müzakirə etmişik, təkliflərimizi vermişik. İnşallah, 2015/2016-cı tədris ilində tikintiyə başlanılacaq”.
Xəbərdən istifadə edərkən istinad etmək vacibdir.
