Şəhərin Qurd dərəsi yaşayış massivində yaşayan sakinlər Xeberle.com-a su təminatında yaranan çatışmazlıqlar barəsində şikayət məktubu ünvanlayıblar. Müraciətdə Qurd dərəsində son 1 ayda su gəlmədiyini, əvvəllər su verilişində fasilələrin 2-3 gündən bir yarandığı halda son 2 həftədə hər gün kəsildiyini, ən azı 8-10 saat susuz qaldıqlarını qeyd edirlər. "Təəssüf ki, artıq adət halını almış kimi - suyun verilişi səhər saat 10-dan axşam saat 12-dək dayandırılır. Gündüz saatlarında, ən əsası yay mövsümündə susuz qalmaq mümkün deyil. Və bir də ölkəmizdəki pandemiya vəziyyəti, hər gün artan xəstəlik sayı, evə qapadılma insanların əsəblərini korlayır. Susuzluq virusun artımına birbaşa təsir edə bilər, çünki təmizlik qaydalarına heç bir halda riayət edə bilmirik. Hər gün 955-ə zəng edirik, onlar da cavab verir ki, suyun təziyiqini ölçürük. 12 saat təzyiq ölçmək olmaz axı! Qəza şəraiti olmadığını söyləyir. Qəza olarsa belə 3 saata bərpa olunmalıdır. Qəza olmadan 12 saat suyun verilişinin dayandırılmasının izahını doğru vermirlər", - deyə məktubda bildirilir.

Mövcud problemlə əlaqəli açıqlama verən "Azərsu" ASC-nin mətbuat katibi Anar Cəbrayıllı söyləyib ki, bu barədə bir neçə açıqlama vermişdir: "Hazırda tərəfimizdən rejim tənzimlənmələri aparılır. Buna görə də 24 saat su alan ərazilərdə su fasilələrlə verilir ki, Maştağa, Zirə, Suraxanı, Türkan, Pirallahı, Qala kimi əraziləri də içməli su ilə təmin edə bilək. Magistral xətlərdən birbaşa su götürən ərazilərdə gündüz saatlarında suyun verilişini dayandırırıq ki, Maştağa anbarına su toplana bilsin. Bütün ərazilərdə su tənzimlənməsi üçün bu gün biz Qurd dərəsi yaşayış massivinə suyu fasilələrlə veririk. Su ehtiyatlarımız azalıb, tələbat isə artıb. Bunun üçün rejim tənzimlənməsi şərtdir, müvafiq cədvəlimizə uyğun rejim tənzimləməsi həyata keçiririk ki, susuz ərazilər olmasın", - deyə qurum rəsmisi bildirib.