Digər sürücü isə açarları götürüb ərazidən qaçdı.

Nəqliyyat Nazirliyi və Dövlət Yol Polisinin əmkdaşları qanunsuz sürücülük fəaliyyəti göstərən şəxslərə qarşı reyd keçiriblər.

Reyd zamanı sürücü ilə nəqliyyat müfəttişi arasında mübahisə yaranıb. Səbəb sürücünün qanunsuz idarə etdiyi avtobusdan düşmək istəməməsi olub. Sumqayıt-Bakı istiqamətində, heç bir lisenziya almadan, sürücülük vəsiqəsiz, sərnişindaşıma ilə məşğul olan şəxs nə Nəqliyyat Nazirliyinin, nə də hüquq-mühafizə orqanlarının əməkdaşlarına tabe oldu. Əksinə onlarla sözün əsl mənasında söz güləşdirərək bölməyə aparıldı.

Masallıdan Sumqayıta qanunsuz idarə etdiyi avtobusla sərnişin çatdırmaq istəyən digər sürücünün istəyi isə ürəyində qaldı. Çünki onun müvafiq sənədləri yox idi. Buna görə də sürücü 100 manat məbləğində cərimə edildi.

Bundan başqa Nəqliyat Nazirliyi və Dövlət Yol Polisi qanunsuz sürücülük fəaliyyəti göstərən şəxsi saxladılar. Digərlərindən fərqli olaraq bu sürücü kiçik tutumlu avtobusunu nəqliyyat müfəttişlərinin üstünə sürdü.

Reyd zamanı sürücülük vəsiqəsi, lisenziyası qaydasında olmayan daha bir avtobus saxlanılsa da, sürücü sərnişinlə dolu avtobusun açarını da götürüb ərazidən uzaqlaşdı. Sərnişinlər isə Nəqliyyat Nazirliyinin əməkdaşları tərəfindən avtobusdan çıxarıldı.

Sükan arxasına əyləşənlərin bəziləri isə, nazirlik əməkdaşlarına nəqliyyat vasitəsinin açarını təqdim etməsə də, bu, onları xilas etmədi. Avtomaşınları cərimə meydançasına aparıldı.

Sumqayıt Regional şöbəsinin sektor müdiri Məzahir Piriyev sözlərinə görə, avtomobilləri idarə edən sürücülərin bəzilərinin sürücülük vəsiqəsi, texniki pasportu yoxdur: "Bunlar sərnişinlər üçün çox böyük təhlükə yaradır. Ona görə də bu cür sürücülərə qarşı mütəmadi olaraq reydləri davam etdiririk. Onlara qarşı inzibati qaydada protokol tərtib olunur”.

Sektor müdiri onu da bildirdi ki, bu cür reydlər ayın sonuna qədər davam edəcək.  (anspress.com)