Sumqayıt şəhəri Hacı Zeynalabdin qəsəbəsi, Karbamid zavodu deyilən ərazidə yaşayan sakinlər bu ərazinin təbii qazla təmin olunmasını, xüsusən qış aylarında çətinlik çəkdiklərini bildirirlər.
Məsələ ilə əlaqədar Xeberle.com-a müraciət edən sakinlərdən biri Ruzbeh Məmməd bildirir ki, bir müddət əvvəl Sumqayıt şəhər İcra Hakimiyyətinə Hacı Zeynalabdin qəsəbəsindəki sözügedən yaşayış ərazisinə təbii qaz çəkilməsi üçün müraciət etəslər də, İcra Hakimiyyətindən bildirilib ki, bunun üçün "Azəriqaz" İB onlara material verməlidir ki, ərazi qazlaşdırılsın. "İB-nin baş direktoru Ruslan Aliyevə müraciət etdim. Dərhal reaksiya verdi, əlaqə saxlanıldı. Məsələ aydın oldu ki, ərazi sənaye təyinatlı torpaqlarda olduğu üçün təyinatı dəyişdirilməlidir ki, qazlaşma aparılsın. Ərazidə bu qədər əhali yaşayırsa, deməli icazə alınıb. İcazəzəsiz daşı daş üstünə qoymaq olmur, Sumqayıt ŞİH-dən və ona tebeli qurumlardan adamlarınız gəlib mane olur. məntiqsizlik və eybəcərlik içində itib batmışıq", - deyə şikayətçi söyləyib.
Vətəndaş həmçinin "Azəriqaz" İB-nin mövcud problemlə əlaqəli verdiyi cavabı da təqdim edib. İdarənin açıqlamasında bildirilir ki, ərazi sənaye təyinatlı torpaqlarda yerləşir və təyinatı dəyişdirildikdən sonra qazlaşdırılma məsələsinə baxılacaq. Bu barədə müraciət edən vətəndaşlara dəfələrlə məlumat verilib.
Sumqayıt şəhər İcra Hakimiyyətindən Xeberle.com-a şikayətlə əlaqəli açıqlamada adıçəkilən ərazinin icra hakimiyyətinin tabeliyində deyil, Sumqayıt şəhər Əmlak Komitəsinin tabeliyində olduğu bildirildi. Həmçinin açıqlamada o da qeyd olunub ki, ərazinin təyinatının dəyişdirilməsi üçün Nazirlər Kabinetinə Əmlak Komitəsi müraciət edə bilər.
Xədicə Səxavətqızı
Xəbərdən istifadə edərkən istinad etmək vacibdir.
