"Bizim dəniz kənarında fakel təsərrüfatımız var. 120 metrlik hündürlükdə quraşdırılan fakel boruları Sumqayıtın hər yerindən baxanda görünür. Bu borular xüsusi olaraq zavodun işə salınması, yaxud işdən dayandırılması zamanı qazların yandırılaraq fakeldən kənara atılması üçün quraşdırılıb".
Bu sözləri Xeberle.com-a açıqlamasında "Azərikimya" İstehsalat Birliyinin Etilen -Polietilen Zavodunun direktoru Oqtay Niftəliyev deyib. Direktor bildirib ki, gecə qəza səbəbindən elektrik xətlərində kəsilmə baş verdiyi üçün bizim zavodun bəzi qurğuları işini dayandırıb: "Qeyd etdiyim kimi, təhlükəsizlik baxımından qəza şəraiti yarananda həmin qazlar yandırılaraq fakelə atılır. Bu, nəzərdə tutulmuş bir prosedurdur. Fikir versəniz, bizim istehsalatda fakel hər zaman yanır. Lakin böyük həcmdə yanğın görünürsə, deməli prosesdə dayanma və ya hər hansı digər hadisə baş verib. Fakelin hündürlüyü elə nəzərdə tutulub ki, heç bir qoxu hiss olunmadan yandırılaraq havaya buraxılan qazlar insan orqanizminə təsir etməsin".
Xatırladaq ki, bu gün səhər saatlarında Sumqayıt şəhərinin bəzi hissələrini qara tüstü bürüyüb.
Tüstünün mənbəyi "Azərkimya" İstehsalat Birliyinin Etilen-Polietilen zavodu olub. Həmin zavodun havaya buraxdığı tüstü sakinləri narahat edib.
Xədicə Səxavətqızı
Xəbərdən istifadə edərkən istinad etmək vacibdir.
