Coratın əsl yaşını dəqiq bilən yoxdur. Amma bu kəndin adını öz yol qeydlərində çəkən səyyahlar, tarixçilər, eləcə də çar Rusiyası məmurlarının tərtib etdiyi müxtəlif hesab və məlumat kitablarında Coratın varlı yer olduğuna dair kifayət qədər məlumata rast gəlmək olar. Corat qəsəbəsinin tarixi eramızdan əvvəl III, IV minilliklərə gedib çıxır. Coratın 2000 yaşı var, deyirlər. Bu qəsəbəni Sumqayıtın qürur rəmzi, tarixinin, mövcudluğunun əsas dayağı hesab edirlər.

Corat iki dəfə - 60-cı və 80-ci illərdə sökülmək və ləğv olunmaq təhlükəsi ilə üzləşib. Qədim qəsəbəni şəhərə qatmaq istəyən "novator” məmurlar burada yeni mikrorayon salmaq eşqinə düşüblər. Vətənpərvər ziyalılar hər dəfəsində etiraz səslərini ucaldaraq qətiyyət göstərib, buna yol verməyiblər. O vaxtlar Sumqayıt Şəhər Partiya Komitəsinin birinci katibi işləmiş Kamran Hüseynov, şəhər icraiyyə komitəsinin sədri olmuş Kamal Axundov bu qədim dənizkənarı qəsəbənin xəritədən silinməsinin qarşısını ala biliblər. Ötən əsrin 89-ci illərində isə qəsəbə sovetinin sədri İsgəndər Qasımovun müqaviməti sayəsində memarların bağışlanmaz səhvi reallaşmayıb.

1953-1958-ci illərdə Sumqayıt Şəhər Partiya Komitəsinin birinci katibi işləmiş Kamran Hüseynov müsahibələrinin birində Coratı sökülmək təhlükəsindən necə xilas edildiyini vurğulayıb: "O vaxt Coratı dağıtmaq istəyirdilər. Mən istəmirdim ki, Corat kimi qədim bir kənd Azərbaycanın xəritəsindən silinsin. Memarları, Azərbaycan Layihə İnstitunun əməkdaşlarını bir yerə yığdıq. Şəhəri bir qədər cənuba böyütmək istəyirdik ki, kənd dağılmasın. Şəhərin baş memarı Eleonora İvanovna Doluxanova bildirdi ki, kənd sökülməli, yerini şəhərə verməlidir. Mən qəti etiraz elədim. Corat kəndini saxlamaq lazım idi. Odur ki, kəndlə şəhər arasında Sumqayıt əhalisinə torpaq sahəsi paylayıb dedim:”Tez olun, ləngiməyin, özünüzə fərdi evlər tikin.” Belə də oldu. Kəndi sökülmək təhlükəsindən xilas elədik. Mərkəzi Komitədə də bizi müdafiə elədilər.”

Xeberle.com