Bildiyiniz kimi, 28 sentyabr 2021-ci il tarixindən etibarən Sumqayıt şəhərində ictimai nəqliyyatda (marşrut avtobuslarda) nağd ödəniş sistemi ləğv olunub və gediş haqqı kart vasitəsilə həyata keçirilir. Lakin bu keçiddən sonra bəzi nöqsanlar da qalmaqdadır. Belə ki, bəzən sərnişinlər kart ödənişlərdə problemlərin yarandığını, ödənişin heç də həmişə rahat keçmədiyini bildirirlər.
Məsələ ilə bağlı "Sumqayıt Nəqliyyat -1” MMC ilə əlaqə saxladıq. Qurumdan Xeberle.com-a bildirildi ki, sərnişinlərimizdən ödəniş zamanı diqqətli olmalarınız xahiş edirik: "Avtobuslarda quraşdırılan validatorlarda kartla ödəniş edən zaman ✅ ("quş”) işarəsi əvəzinə ❎ ("iks) işarəsi göründüsə, demək sizin kartlarınızda balans yoxdur. Belə olan halda narahatlıq yaradıb, "ola bilməz, kartda balansı artırmışam və sair”, - deməyin mənası yoxdur. Əgər həqiqətən kartınızda məbləğ varsa (məsul şəxslərə bankların post terminalı verilib), balansda həqiqətən pulun olub olmaması yoxlanılacaq. Bununla da bütün şübhə və narahatlıqlara son qoyulacaq. Bəli, əslində validatorlarda balansın görünməsi daha yaxşı olardı, lakin sistemlə əlaqəli olaraq bu, hələlik mümkün deyil. Lakin yaxın dövrdə - onlayn sistemə keçdikdən sonra ödəniş edilən zaman balans görünəcək. Təəssüf edirik ki, bəzi sərnişinlər bu halda sui-istifadə etməyə cəhd edir, kartda balans olmadığı halda əksini sübut etməyə çalışırlar. Beləliklə, balansda pul varsa, 1 dəfə kartı yaxınlaşdırıb ✅ ("quş”) işarəsi görünən kimi kartı götürmək lazımdır. Kartı dəfələrlə validatora vurub, balansdan bir neçə dəfə çıxılması halları əlbəttə ki, heç kimə xoş olmaz. əgər həqiqətən də kart balansında pul var və validatora vuran zaman ❎ ("iks) işarəsi göründüsə, 20 saniyə gözləyin və sonra təkrar vurun. Yaxşı olar ki, bu məqamları bütün Sumqayıt sakinləri bilsin. Odur ki, hörmətli sərnişinlərdən bu mənada diqqətli olmalarını xahiş edirik”, - deyə qurum rəsmisi bildirib.
Xəbərdən istifadə edərkən istinad etmək vacibdir.
