Lerikə istirahətə getmək istəyən bir qrup Sumqayıt sakini "Sumqayit turlar” adı altında Azərbaycan rayonlarına səfərlər təşkil edən şirkət tərəfindən aldadılıb.
Xeberle.com məlumat verir ki, şikayətçilər "Sumqayit turlar”ın onlara vəd etdiyi kimi səfər təşkil edə bilmədiyini iddia edir:
"Mayın 29-da 50 nəfərlik komandamızla Lerikə istirahətə getmək üçün müraciət etdik. Bütün şərtlərdə razılaşma oldu və biz pulumuzu ödəyib, Lerikə yollandıq. Lakin nə tur rəhbərindən, nə də nahar yeməyi üçün getdiyimiz restorandan razı qalmadıq. Səfər zamanı fotosessiya vəd olunmuşdu, onu da etmədilər. Biz şikayət etməklə istəyirik hər kəs bu tur şirkətinin fırıldaqçılığını bilsin və bizim kimi aldanmasınlar”.
Xeberle.com əməkdaşı tur şirkəti ilə də əlaqə saxlayıb. Özünü tur-şirkətin rəhbəri kimi təqdim edən Cəmilə xanım bildirib ki, sözügedən 50 nəfərlik qrupla birgə həmin gün onların 20 nəfərlik digər qrupları da Lerik rayonuna səfər edib. "Şikayət edən qrup əvvəldən problemli idi. Onlar üçün ayırdığımız tur rəhbərini bəyənmədiklərini bidirdilər. Bütün səfərlər zamanı paketə yalnız səhər yeməyi daxildir. Nahar zamanı isə öz istəkləri ilə restorana aparılıblar və həmin gün üçün bir çox turlar tərəfindən səfərlər olduğu üçün restoranda sıxlıq olub, sifarişlər hamıda gecikib. Fotossesiya probleminə gəldikdə isə, onların tur rəhbərində kameranın kartı itdiyindən digər qrupun rəhbəri onlar üçün də fotosessiya edib və link vasitəsi ilə özlərinə göndərilib. Onlara olunan vədlərdən yalnız fotosessiya üzrlü səbəblərdən olunmayıb. Biz bu işlə birinci dəfə deyil ki, məşğul oluruq. Belə bir şeyin olması mümkün deyil ki, biz insanları aparaq aldadaq", - deyə tur-şirkətdən bildirilib.
Xəbərdən istifadə edərkən istinad etmək vacibdir.
