Sumqayıt sakinlərini narazı salan problemlərdən biri də ictimai nəqliyyatla, xüsusən də 30 saylı marşrut avtobus xətti ilə bağlıdır. Bu sahədə problem xüsusilə səhər və axşam saatlarında yaşanır. Günün pik saatlarında ictimai nəqliyyatdan istifadə edənlər dayanacaqlarda uzun müddət gözləməli olurlar və dayanacaqlarda sərnişin sıxlığı yaranır. Şübhəsiz ki, avtobus çatışmazlığı və ya interval problemi xidmətin aşağı səviyyədə olduğunu göstərir.
Bu marşrut üzrə hərəkət edən avtobuslar gec gəldiyindən gözləyən sərnişinlər rahat şəkildə ünvanlarına gedə bilmədiklərindən şikayətçidirlər.
Şikayətlə əlaqədar
Xeberle.com-a Sumqayıt şəhər İcra Hakimiyyətinin başçısı yanında Sərnişindaşıma və Nəqliyyat İdarəsinin rəis müavini Tofiq Saydumov açıqlama verərək bildirib ki, hazırda idarədə sürücü qıtlığı problemi var. "Marşrut avtobusların heç 30%-ni xəttə çıxarda bilmirik. Əsasən də, 30 saylı marşrut üzrə bu, daha nəzərəçarpan dərəcədədir. T.Saydumov həmçinin qeyd edib ki, bununla bağlı yerli televiziya kanalında elan da vermişik. Yay aylarında həmişə sürücü qıtlığımız olur. Yaxın zamanlarda problem öz həllini tapacaq”, - deyə idarə rəsmisi bildirib.
Sumqayıt sakinlərini sərnişin avtobuslarında mövsümlə bağlı daha bir məqam hər zaman narahat edir. Yay fəslinin daxil olması ilə şəhərimizdə havanın gündən-günə isinməsinə baxmayaraq ictimai nəqliyyatda kondisionerlər hələ də çalışmır. Günün pik saatlarında sərnişin sıxlığı olduğundan, avtobuslarda yaranan xoşagəlməz vəziyyət daha da qəlizləşir.
Sözügedən İdarənin rəis müavini Tofiq Saydumov bu mövzu ilə məlumat verərək bildirib ki, iyun ayının 15-dən nəqliyyat vasitələrində soyutma sistemlərinin qoşulması nəzərdə tutulub. "Nasazlığı, problemi olan avtobuslarda soyutma qurğuları təmir olunur. İyun ayının 15-dən etibarən bütün nəqliyyat vasitələrində kondisionerlərin işlək vəziyyətdə olmasına çalışacağıq”, - deyə T.Saydumov qeyd edib.
Xədicə Səxavətqızı
Xeberle.com
Xəbərdən istifadə edərkən istinad etmək vacibdir.
