Sumqayıt şəhər, 9-cu mikrorayon 26-cı bina sakinləri yaşadıqları binanın zirzəmisinin çirkab sularla dolmasından narazılıq edir. Sakinlər bildirir ki, binanın kanalizasiya xətləri köhnə olduğundan istismara yararsızdır və xətlərdən axan sular binanın zirzəmisinə axır.
"Çirkab sulardan qalxan üfunət qoxusu evlərdə rahat nəfəs almağa imkan vermir. Aşağı mərtəbələrdə çox yüksək rütubətlilik var, xəstəlik mənbəyidir bu bina. Bu çirkab ağcaqanadların çoxalması üçün münbit şəraitdir. Müvafiq qurumlardan xahiş edirik, binanın acınacaqlı vəziyyətinə bir əlac qılsınlar".
Xeberle.com yaranan problemə aydınlıq gətirmək üçün Sumqayıt Sukanal İdarəsi ilə əlaqə saxladı. İdarədən bildirildi ki, əraziyə baxış keçirilib, kanalizasiya boruları tutulduğu üçün tullantı suları zirzəmiyə axırdı. Borular təmizlənib, yaranan problem artıq öz həllini tapıb.
Xədicə Səxavətqızı
Xeberle.com
Xəbərdən istifadə edərkən istinad etmək vacibdir.
