Şamaxı rayonunda qısa vaxtda 3277 ton üzüm yığılıb.
Hazırda rayonun cənub ərazilərindəki plantasiyaların məhsulu toplanılır. Belə ki, fermerlər və fiziki şəxslər Məlikçobanlı, Göylər, Meysəri, Çarhan ərazi vahidlərindəki, habelə Sabir və Şəhriyar qəsəbələrindəki bağların məhsulunun vaxtında və itkisiz toplanması üçün bütün qüvvələri səfərbərliyə alıblar. Süfrə üzümü birbaşa bazarlara göndərilir.
Qeyd edək ki, Şamaxıda vaxtilə rayon iqtisadiyyatının aparıcı sahəsi olan üzümçülüyün inkişafı istiqamətində ardıcıl tədbirlər görülür. Artıq plantasiyaların sahəsi 1710 hektara çatdırılıb ki, bunun da 1315,2 hektarı məhsuldardır. Ötən il rayonda 8399,5 ton üzüm istehsal edilib. Bu isə əvvəlki ildəkindən 2868,2 ton çoxdur. Mütəxəssislərin fikrincə, cari ildə məhsul istehsalı 11,5 min tondan çox olacaq.
(azərtac)
Xəbərdən istifadə edərkən istinad etmək vacibdir.
