Xeberle.com məlumat verir ki, bir müddət əvvəl Sumqayıtın Bakı küçəsində, daha doğrusu 39 və 40-ci məhəllələr arasında yerləşən avtomobil yolu qazılaraq ərazidən keçən su xətləri yenilənmişdi. Ərazidə aparılan təmir işləri yekunlaşandan sonra isə qazılan yola asfalt örtüyü döşənməyib. Bu da yağan yağışdan sonra yolda bir sıra fəsadların yaranmasına səbəb olub.  Belə ki, bu gün günorta saatlarında ərazidən keçən yük avtomobilləri yolda batıb qalıblar.Bir müddətdən sonra avtomobillər digər nəqliyyat vasitələrinin köməyi ilə bataqlıqdan çıxarılıb.
Maraqlıdır ki, əksər hallarda kommunikasiya xətlərini dəyişən aidiyyatı qurumlar yolları qazır, təmir işləri aparır və nəticədə yolun asfalt örtüyünü əvvəlki vəziyyətin bərpa etməyərək ərazini tərk edirlər.  Onların bu laqeydliyindən və işə məsuliyyətsiz yanaşmalarından isə sakinlər əziyyət çəkir. Yaxşı olardı ki, aidiyyatı qurumlar təmir apardıqları ərazilərin asfalt örtüklərini bərpa etsinlər.
Fariz Əli, xeberle.com