Hər dəfə ekran qarşısında heyranlıqla izlədiyimiz məşhurları görəndə onlara bənzəmək istəyir, onlar kimi geyinmək, danışmaq, davranmaq, saç düzümünü onlar kimi etmək və s. kimi fikirlər keçir beynimizdən. Hətta pərəstiş etdiyi, fanatı olduğu insanı öz idealı kimi görənlər də az deyil.

Amma hər cəhətdən idealınız kimi qəbul etdiyiniz məşhurların hətta, uşaqlıq illərindən bəri mübarizə apardığı, lakin qurtula bilmədiyi çox qəribə vərdişləri var.

Oxu.Az-a bu barədə etiraf edən tanınmışların qəribə vərdişlərindən sizi də agah edirik.

ABŞ-da yaşayan azərbaycanlı teleaparıcı Günel Musəvi özünün dediyinə görə, təmizlik xəstəsidir. O söyləyir ki, hətta evə təmizlikçi qadın gələndə də onu yarı yolda saxlayıb, özü təmizlik işlərinə başlayır. Günel hər dəfə yeni təmizləyici vasitələr satışa çıxarılanda onları mütləq alıb, sınaqdan keçirir. Aparıcının sözlərinə görə evində ən azı 4 ədəd döşəmə silən, 3-dən çox süpürgə, xeyli sayda salfetlər və müxtəlif təmizləyici vasitələr var.

“Best Model of the World 2007”-nin qalibi model Rüstəm Cəbrayılov isə hələ də uşaqlıq illərindəki kimi cizgi filmləri izləyir.

Aktyor Elnur Kərimovun insanları müşahidə və analiz etməyi onun ən sevdiyi vərdişinə çevrilib. Onu hamıdan fərqləndirən vərdişi isə hər şeyi öncədən hiss edib, ehtiyatlı hərəkət etmək və gözlənilməz anda zərbə vurmaqdır.

Müğənni Elnar Xəlilov etiraf edir ki, qadınlara çox vaxt ayırmaq, artıq onda vərdiş halını alıb. Hətta oxuduğu mahnıların böyük əksəriyyəti sevgiyə inanmamağı və həyatında olan qeyri-ciddi münasibətlərdən bəhs edir.

Aparıcı Anar Cəfərovun o qədər qəribə vərdişləri var ki, heç bilmirəm hansından başlayım. Birinci onu deyim ki, Cəfərov qapını açarla bağladıqdan sonra dəfələrlə onu yoxlayır. O, yolun yarısından geri dönüb yenə də qapının bağlanıb-bağlanmadığını dəqiqləşdirir. Hətta 2-ci dəfə qayıdıb yoxladığı vaxtlar da olur. Teleaparıcının qəribə vərdişlərindən biri də odur ki, “Ptichye moloko” şokoladlarını yeyəndə əvvəlcə kənarını, daha sonra ortasını yeyir. Onun daha bir vərdişi də var. Saatın zəngini oyanacağı vaxtdan 10 dəqiqə əvvələ qurur, amma həmin vaxtdan yarım saat sonra oyanır. Ən qəribəsi odur ki, metroda turniketdən keçəndə yalnız 4-cü və 5-cidən keçir, amma bunun səbəbini bilmir. Hər gün mütləq televizora yaxud hansısa filmə baxmalıdır, əgər bunu etməzsə, ona elə gəlir ki, həmin günü yaşamayıb.

Müğənni Afaq Aslan kamera qarşısında, efirdə tez-tez saçları ilə oynayır. Bax, bu vərdişini tərgidə bilmir.

Stilist Samiraldo illərdir ki, polis görəndə naz edir. Hətta polis ona fikir verməyəndə qəsdən yolunu dəyişib yanından keçir ki, onu görsün.

Model, aktrisa Minarə Allahverdiyeva uşaqlıqdan bəri qəribə vərdişini tərgidə bilmir. O, həmin vərdişini neçə illərdir ki, hamıdan gizlədir. Lakin bizdən gizlədə bilmədi. Sən demə, model kirpiklərini qoparır və bu vərdişindən heç cür qurtula bilmir.

Təşkilatçı Aqil Məmiyevin isə tez-tez danışmaq kimi vərdişi var. Təşkilatçı bu vərdişini heç sevmədiyini, lakin onu tərgidə bilmədiyini söyləyir.

Müğənni Samir Piriyev yeməkləri qarışdırıb yeməyi sevir. Məsələn, ya çaydan sonra meyvə, ya meyvədən sonra bal, ya da baldan sonra bozbaş yeyir. Hər dəfə harasa hazırlaşanda qarderobda nə qədər geyimi varsa, hamısını yerə tökür, seçdiyi geyimi tapandan sonra darmadağın etdiyi geyimləri öz yerinə yerləşdirmir.

Aparıcı Cavid Gül avtomobildə əyləşəndə mütləq kəmər taxır. Hər dəfə yeməyin sonunda, bir tikə çörək saxlayıb boşqabı sıyırır.

Stilist-vizajist Pərviz Mirzəyev səhər tezdən ona kimsə zəng edib oyadırsa, həmin insanı söyür. Yuxudan oyananda yatağında mütləq qəhvə olmalıdır. Ən qəribə vərdişi isə duş qəbul edəndə söhbət etməyi sevməsidir. Ona görə hər dəfə duş qəbul edəndə kim isə mütləq onun yanında olmaldır.

Aytən Sadıqzadə