Dekabrın 23-də Beynəlxalq Mətbuat Mərkəzində yazıçı Varisin Moskvada, nüfuzlu «Sovremenniki i klassiki» seriyasından çap edilən «Yanvarın 13 günü» kitabının mediaya təqdimatı keçirilmişdir.

2015-ci ilin Rusiya prezidenti Vladimir Putin tərəfindən «Ədəbiyyat ili» elan olunması münasibəti ilə Moskva şəhər hakimiyyəti ilə Beynəlxalq Yazıçılar İttifaqı birgə Beynəlxalq Moskva Ədəbiyyat Mükafatını təsis etmişlər. Həmin mükafatın qısa siyahısına düşən 20 yazıçı arasında (Sergey Lukyanenko, Lev Anninski, Yevgeni Reyn, Andrey Şerbak və s.) həmyerlimiz Varis Yolçiyevin də adı var.

Finalçılar Rusiyanın məşhur «Sovremenniki i klassiki» vintaj seriyasından kitab çap etdirmək hüququ qazanmışlar.

Ümumən 70 cilddən ibarət və ilk cildi Lev Tolstoyun «Hərb və sülh» romanı olan seriyada 50 cild rus ədəbiyyatının qızıl və gümüş dövrünün tanınmış klassiklərinə aid edilib, 20 cild isə Moskva Ədəbiyyat Mükafatının finalçılarına ayrılıb.

Qorki adına Ədəbiyyat İnstitutunda, Mərkəzi Ədiblər Sarayında, «Non-fikşen» kitab sərgi-yarmarkasında və bir neçə böyük kitabxanada təqdimatları keçiriləcək kitablar Rusiyanın, eləcə də Avropa və Amerikanın kitab mağazalarında, həmçinin «LitRes» kimi nəhəng elektron kitab ticarətçisinin şəbəkələrində satışa çıxarılmışdır.

Həmyerlimizin «Yanvarın 13 günü» kitabı (Redaktoru L.Romanenko) yeni ilin ilk 13 günündə yazıçının fəlsəfi düşüncələrini əhatə edir, hər günün sonunda da yazıçı oxucularına bir hekayə təqdim edir. Əsərin qəhrəmanı cəmiyyətdə daim öz yerini axtaran, özünü özünə tanıtmaq yolunda daim əziyyət çəkən, Xeyir və Şər arasındakı əbədi mübarizədə gah qazanan, gah da itirən İnsandır.

Beynəlxalq Moskva Ədəbiyyat Mükafatının rəsmi internet saytında kitab oxuculara bu cür təqdim edilir:

«Formasına görə əsər yazıçının gündəliyini xatırladır ki, orada da o, həyatın mənası, xoşbəxtlik, insan taleləri, sevgi barədə düşüncələrini qeyd edir. Kitabın adında yazıçının təsvir etdiyi zaman yer alır, nəqletmədə isə onun fəlsəfi fikirləri sıralanır.

Bu fəlsəfi fikirlərin bir çoxu, deyərdik ki, aforizm səviyyəsindədir:

Bəzilərinin köksündə ürək yerləşir, bəzilərində ət parçası...

Ən yüksəkdə qətiyyətlə addımlayanlar dayanıb, ortada büdrəyənlər, ən aşağıda isə yıxılanlar...

İnsanlar bütün ömürləri boyu xoşbəxtlik axtarsalar da ağrıyla, əzabla, ölümlə üzləşirlər. Xoşbəxtliyin dəqiq ünvanını bilən bir ovuc şəxs heç vaxt bunu başqaları ilə bölüşmür».

Əsərdə Azərbaycanın tolerantlığına, xalqımızın mənəvi zənginliyinə, Qarabağ mövzusuna da yer ayrılıb.