Tədbirdə tanınmış yazıçılar, ziyalılar, qələm sahibləri, ictimaiyyət və media nümayəndələri iştirak ediblər.
Azərbaycan Yazıçılar Birliyinin Natəvan klubunda "AYBKitab” layihəsi çərçivəsində nəşr edilmiş Günel Eyvazlının "Cadugər" kitabının İMZA GÜNÜ keçirilib. Tədbirdə tanınmış yazıçılar, ziyalılar, qələm sahibləri, ictimaiyyət və media nümayəndələri iştirak ediblər.
İlk öncə tədbiri açıq elan edən AYB-nin gənclər üzrə katibi Rəşad Məcid Rəşad Məcid gənc yazar Günel Eyvazlı haqqında müsbət fikirlər səsləndirdi. O, bildirdi ki, Günel Eyvazlı 7-8 ildir Yazıçılar Birliyinin üzvüdür və bu illər ərzində kifayət qədər öz üzərində çalışıb: "Günel Eyvazlı bizim zəhmətkeş gənclərimizdəndir. Onun müxtəlif qəzetlərdə və media orqanlarında yazıları, şerləri, hekayələri və essələri dərc edilir. Bir sözlə çox şaxəli fəaliyyətlə məşğuldur və başını aşağa salaraq öz yaradıcılığı ilə məşğuldur.”
Bundan sonra çıxış edən AYB katibi İlqar Fəhmi bildirdi ki, 2000-ci illərin əvvəllərində ölkədə gənclərin ədəbiyyata marağı olduqca az idi: "Lakin sonrakı illərdə ədəbiyyata qarşı gənclərdə xeyli sayda maraq və həvəs yarandı. Günel Eyvazlı da həmin nəslin davamçılarındandır. Onu da qeyd edim ki, həmin dövrlərdə ədəbiyyata maraq göstərənlərin bəziləri sona qədər getmədilər. Bu baxımdan Günel dözümlü çıxdı və sona qədər fəaliyyətini davam etdirdi.”
Tədbirdə digər iştirakçılar da çıxış edərək gənc yazarın yaradıcılığı ilə bağlı xoş sözlər səsləndirərək ona gələcək fəaliyyətində uğurlar arzu etdilər.
Sonda çıxış edən Günel Eyvazlı dəvəti qəbul edib tədbirə qatılan hər bir kəsə öz təşəkkürünü bildirdi.
Tədbir sonda yazarın oxucuların kitablarını imzalaması ilə sona çatdı.