İnsan Hüquqlarının Tədrisi Üzrə Resurs Və Təlim Mərkəzinin Ədəbiyyat-Müzakirə Klubunun növbəti görüşü keçirilib. Klubdan “Xeberle.com”-a verilən məlumata görə,  Etel Lilian Voyniçin “Ovod” əsəri ətrafında keçirilən müzakirə maraqlı anları ilə yadda qalıb. Tədbirin təşkilatçılarından olan gənc yazar Aydın Şahid çıxış edərək  Ədəbiyyat-Müzakirə Klubunun fəaliyyəti haqqında gələn qonaqlara qısa məlumat verib. Daha sonra tədbirin digər təşkilatçısı, Ədəbiyyat-Müzakirə Klubunun rəhbəri Nigar Nəsiminin moderatorluğu ilə tədbirə təşrif buyurmuş orta yaşın nümayəndələri ilə gənclər arasında azad düşüncə, manipulyasiya və manipulyatorlar, vətənpərvərlik və mübarizlik ruhu mövzularında fikir mübadiləsi aparılıb. Qeyd edək ki, Ədəbiyyat-Klubun bu görüşü Xocalı soyqırımı ərəfəsinə təsadüf etdiyindən tədbir məhz  “Ağlamaq yox düşünmək vaxtıdır” adlandırılıb. “Biz Xocalını ağlayaraq anmayacağıq” şüarı ilə səsləndirən gənclər ağlamaqdansa düşünməyə və düşündüklərini bölüşməyə üstünlük verdikərini açıqlayıblar. Müzakirələrin gedişatında Nigar Nəsimi məşhur “Cəsur ürək” filminin qəhrəmanı Vulyon Volosun öz ordusu qarşısındakı dəqiqə yarımlıq çıxışını xatırlatmış və yekunda C.Bukovskinin “ Sadəcə həqiqətən yaşayan biri ölə bilər. Yas mərasimlərinin çoxu ölülərin bir-birini dəfn etməsindən başqa bir şey deyildir” sözləri ilə insanları azad düşünməyə səsləmişdir : Ölüm qaçılmazdır, gəlin yaşayaraq ölək, sürünərək deyil!