Bu barədə Xeberle.com-a açıqlama verən Sumqayıt Poeziya Evinin direktoru İbrahim İlyaslı Türkiyədən təşrif edən qonaqların say tərkibinin 37 nəfər olacağını bildirib: " Tədbirdə iştirak edəcək heyətin rəhbəri Türk Ədəbiyyatı Vəqfinin başqanı şair-ədəbiyyatşünas, naşir Serhat Kabaklıdır. Onunla yanaşı, tədbirdə vəqfin idarəetmə heyətinin üzvləri Mehmet Atalay, Ömər Balıbəy, prof.dr. Ramazan Korkmaz, Türkiyə Böyükelçiliyinin Mədəniyyət və Tanıtım müşaviri İrfan Ciftci, yazıçı-tərcüməçi İmdat Avşar, sənətçi Əsəd Kabaklı və s. iştirak edəcəklər.

Tədbir ilk olaraq fevral ayının 10-u  Azərbaycan Yazıçılar Birliyinin "Natəvan" klubunda, daha sonra millət vəkili Qənirə Paşayevanın rəhbərlik etdiyi Avrasiya Beynəlxalq Araşdırmalar İnstitutu İB-nin xətti ilə Rəşid Behbudov adına Mahnı Teatrda keçiriləcək. "Natəvan" klubunda keçiriləcək tədbirdə yazıçı Mir Cəlal Paşayevin və Anarın Türkiyə türkcəsinə tərcümə edilən kitablarının təqdimatı olacaq, R. Behbudov adına Mahnı Teatrında isə Türkiyəli yazarlarla görüş keçiriləcək.Sonuncu tədbir fevralın 11-də Sumqayıt Poeziya evində olacaq və həmin gün eyni zamanda Serhat Kabaklının tərcümə edilmiş kitabının təqdimat mərasimi keçiriləcək. Tədbirdə AYB-nin katibi Rəşad Məcid də iştirak edəcək. "

Qeyd edək ki, Serhat Kabaklının "Bil oğlum” adlı kitabı tanınmış şair, Prezident təqaüdçüsü , Azərbaycan Yazıçılar Birliyinin üzvü və Poeziya Evinin direktoru İbrahim İlyaslı tərəfindən tərcümə edilərək, Mütərcim Nəşriyyatında çap olunub.

Elnarə Salamova

Xeberle.com