Tanınmış yazıçı-publisist və kinossenarist, Azərbaycanın Əməkdar jurnalisti Eyruz Məmmədovun yeni bədii əsəri - "Sən kimsən, Armando?" işıq üzü görüb.

 

Xeberle.com-un verdiyi məlumata görə, yazıçının əvvəlki əsərləri kimi yeni kitabı da "Azəri" nəşriyyatında çap edilib. Kitabın redaktorları Aygün Hacıyeva və Arif Ərşaddır. Əsərin əsas qəhrəmanlarından biri təmiz qəlbli kitabxanaçı qız Aliyədir. Güclü dramatizmi ilə diqqəti cəlb edən bu əsərdə gənc oğlan və onun sevdiyi qız - kitabxanaçı Aliyə cəmiyyətlə səbəbi anlaşılmayan ictimai-siyasi qarşıdurmaya cəlb edilərək, bu xaosdan aydınlığa, işıqlığa doğru çıxmağa çalışaraq, çox ağır, gözlənilməz vəziyyətlərlə üzləşirlər. Hər şey Aliyəyə qarşı səbəbi bilinməyən sui-qəsd təşkil edilməsindən başlayır. Bunu kim və nə məqsədlə edə bilərdi?! Bu sual sevgilisini çox düşündürür və o, hadisəni araşdırmaq qərarına gəlir. Bir sıra şəxslə görüşür və dostlarını da bu işə cəlb edir. Bəzi məsələlər aydınlaşmaqda ikən onun özünü aradan götürmək istəyirlər. Ona qarşı da sui-qəsd təşkil edilir. Cinayətkarlar onun öldüyünü zənn edib, aradan çıxırlar. Ancaq Aliyənin sevgilisi təsadüf nəticəsində sağ qalır. Müalicə olunduqdan sonra da fikrindən dönmür, hansı qüvvələrin və nə məqsədlə onlara qarşı düşmənçilik etdiklərini aydınlaşdırmaq istəyir. Axı, onun fikrincə, nə onun, nə də Aliyənin açıq-aşkar düşmənləri yox idi. Bəs, bu, kimlər ola bilərdi? Əsərdə hadislər getdikcə gərginləşir, qaranlıq qalmış suallara tədricən aydınlıq gətirilir. Məlum olur ki... Nəyin məlum olduğunu bilmək istəyirsinizsə, kitabı əldə etməyə tələsin.

 

Qeyd edək ki, kitab artıq satışdadır.