Azərbaycan Yazıçılar Birliyi Sumqayıt bölməsi və Nizami Gəncəvi adına Kitabxana Klubun birgə təşkilatçılığı ilə Azərbaycan Yazıçılar Birliyi və Azərbaycan Jurnalistlər Birliyinin üzvü, jurnalist, publisist, yazıçı Eyruz Məmmədovun "Epi” romanının təqdimat mərasimi keçirilib. Adıçəkilən kitabxanada təşkil olunan tədbirdə AYB-nin Sumqayıt bölməsinin müdiri Gülnarə Cəmaləddin, S.Vurğun adına Mərkəzi Kitabxananın müdiri Yeganə Əhmədova yazarın yaradıcılığı ilə bağlı giriş nitqi söylədikdən sonra sözü müəllifə veriblər.
Eyruz Məmmədov təşkilatçılara təşəkkürünü bildirərək, roman haqqında oxuculara qısa məlumat verib. O, "EPI" romanının digər romanlarından ciddi şəkildə fərqləndiyini, əsərin əsas qayəsinin fəlsəfə, psixologiya, yaşam olduğunu diqqətə çatdırıb. Belə ki, romanın qəhrəmanı - epilepsiya xəstəsi qıcolma zamanı ruhu bədənindən çıxır və dünyanın epileptik olan tarixi şəxsiyyətləri ilə ruhən görüşür və burada xeyirlə-şərin mübarizəsi təsvir olunur. Əsərdə göstərilən iblis və şeytanlar insanın qəlbinə girərək onları yoldan azdırır, Allaha qarşı çıxmalarına məcbur edirlər. Təsvir olunur ki, onların öz cəhənnəmləri var və bu da Yer kürəsidir, burda yaşayan insanlar cəhənnəmin qanunları ilə ömür sürürlər...
Tədbirdə yazıçının qələm dostlarından AJB Sumqayıt təşkilatının sədri Rafiq Oday, şair Asif Asiman, Xəqani Abbasəli Öztürk, Müqəddəs Şahbazov, yazıçı Arif Ərşad, Şəhər Ağsaqqallar Şurasının üzvi Vahid Cəfərov, Sumqayıt Dostlar Klubunun üzvü Rafiq Mehdiyev, Xeberle.com informasiya portalının həmtəsisçisi Elnur Ağayev, kitabxananın əməkdaşları Natəvan Axundzadə, Zərnigar Babayeva, Zibeydə Sərxanqızı və digərləri çıxış edərək əsərin məziyyətlərindən söz açıblar.
Sonra müəllif oxucuların ona ünvanlanmış çoxsaylı suallarını cavablandırib.
Ailə üzvlərinin adından yazıçının qızı, gənc jurnalist Nərmin Eyruzqızı çıxış edərək belə tədbirlərin keçirilməsinin əhəmiyyətindən, atasının ailədə, qohum və dostlar arasında diqqət və qayğısından söz açaraq, Eyruz Məmmədov yaradıcılığına olan diqqətə görə hər kəsə öz minnətdarlığını bildirib.
Xəbərdən istifadə edərkən istinad etmək vacibdir.
