Bu gün AMEA-nın Nəsimi adına Dilçilik İnstitutunda "Teleaparıcılar üçün ikihəftəlik treninqlərin yekunu” na həsr olunmuş dəyirmi masa keçirilib. İnstitutun Mətbuat xidmətindən Xeberle.com-a bildiriblər ki, tədbiri giriş sözü ilə açan Dilçilik İnstitutunun direktoru akademik Tofiq Hacıyev "Dövlət Proqram”ı ilə bağlı görülən işlərdən söhbət açıb. T.Hacıyev bildirib ki, televizya ilk növbədə informasiya mənbəyidir. Dilin informativ, estetik, ideoloji funksiyaları daha çox KİV-də özünü göstərir. Bunun üçün aparıcılar öz üzərlərində daha çox işləməlidirlər.
Bu baxımdan treninqin keçirilməsinə böyük ehtiyac vardır. T.Hacıyev qeyd edib ki, aparılan treninqlər KİV-lə Dilçilik İnstitutu arasında olan əlaqələrin möhkəmlənməsinə də xidmət edir. Monitorinq şöbəsinin müdiri professor Qulu Məhərrəmli öz çıxışında treninqlərdə teleaparıcılara ədəbi normalar sistemi, şifahi və yazılı nitq normaları, vurğu, ifadəli oxu və s. kimi mövzuların izahlarının verildiyi barədə danışdı.
İki həftə davam edən treninqlərdə Atv, İtv, Xəzər, Regon tv, Ans, Lider və Space telekanallarının aparıcı və diktorları iştirak edib. Treninqlərdə Dilçilik İnstitutunun alimləri teleaparıcılara müxtəlif mövzularda mühazirələr oxumuşlar. Təlimlər yüksək səviyyədə keçirilib. Sonda təlim iştirakçılarına sertifikat verildi.