Hamımızın bildiyi kimi ölkəmiz dünya səviyyəsində möhtəşəm bir idman yarışına ev sahibliyi etdi. Bu idman yarışlarında iştirak etmək üçün 50 ölkədən minlərlə idmançı və onların nümayiş etdirdikləri oyunlara tamaşa etməyə onminlərlə azarkeş ölkəmizə təşrif buyurmuşdu. Hamıya məlumdur ki, turistlər əsasən oyunlara tamaşa etmək üçün ölkəmizdə idilər.

Həm də aydın məsələdir ki, həmin turistlər möhtəşəm oyunlara ev sahibliyi edən ölkənin tarixi, həmçinin mədəniyyət ocaqlarıyla, bir sözlə gəzməli görməli yerləri ilə də maraqlanıb ekskursiyalar etdilər. Necə deyərlər həm ziyarət həm ticarət.

Bəli, budəfəki mövzumuz ölkəmizə təşrif buyuran turistlərdir. Lakin onların daha çox hansı məkanlarımıza maraq göstərdiyi ilə deyil, gənclər şəhəri olan Sumqayıta gəlib gəlmədikləri haqqında məlumat öyrənməyə çalışdıq.
Əvvəlcə onu deyək ki, Bakıda aydın məsələdir ki, turistlər boldur. Hətta oyunlar başlayan gündən Bakının mərkəzi küçələrində xarici turistlərin sayı artıb. Turizm şirkətlərinin bələdçiləri onları şəhərdə gəzdirir və görməli yerlər haqda məlumatlar verirlər.

Bəs görəsən ölkənin 3-cü böyük şəhəri olan, Bakıyla 25 km məsafəsi olan Sumqayıt niyə belə tipli tur-paketlərin marşrut xəttinə salınmadı? Buna mane olan nədir axı: Gənclər şəhərinin gəzməli görməli yerlərinin olmaması, olanları da yüksək səviyyədə gələn qonaqlarımıza təqdim etmək bacarığının olmamasımı, yoxsa ki aidiyyəti qurumların bu məsələyə ciddi yanaşmamasımı?
Sözügedən mövzuyla bağlı Sumqayıt şəhər Mədəniyyət və Turizm İdarəsinin rəisi Namiq Qaffarova müraciət etdik. "Avropa oyunları zamanı ölkəmizə gələn turistlər Sumqayıt şəhərinə də səfər etdilərmi?” sualımıza Namiq Qaffarovun cavabı belə oldu:

"Ümumiyyətlə bizdə o haqda bilgi yoxdur. Çünki şəhərimiz turizm agentliklərinin tur marşrutlarına daxil deyildi. Həm də ki, turistlər oyunlara baxmağa gəlmişdilər.”

Bəlkə də müəyyən mənada müsahibimiz haqlıdır. Turist paytaxtda keçirilən oyunlara tamaşa etməyə gəlib. Amma mən yenə də sözümün üstündə inadla dururam. Əgər şəhərimizdə olan tarixi obyektlər və mədəniyyət turizm mərkəzləri, muzeyimiz turistləri yüksək səviyyədə qəbul etmək imkanlarına sahib olsaydı, turizm şirkətləri marşrutlarına bizim şəhərimizin də adını salardılar. Əgər bu gün şəhərimiz heç bir mədəni tarixi obyekti ilə turist cəlb edə bilmirsə, günah kimdədir?

Sonda onu da deyim ki, Sumqayıt özü yetəri qədər inkişaf mərhələsində olsa da, şəhərin bir dənə də olsun özünə məxsus turizm şirkəti yoxdur ki, onun mədəniyyət ocaqları, muzeyləri gələn turistlərdə maraq oyatsın.

Xədicə Səxavət

Xeberle.com