Avropa mətbuatında türklərə qarşı bioloji silah hazırlanması planı barədə geniş araşdırma məqaləsi dərc olunub.
ANS PRESS-in məlumatına görə, Türkiyə qırıcıları tərəfindən Rusiyaya məxsus Su-24bombardman təyyarəsinin vurulması barədə xəbərlərin fonunda məqalə bir çox ölkələrdə böyük maraq doğurub. Bəzi rus portalları hətta xəbəri başlığa çıxarıb. 
"Historical Review” jurnalının səhifələrində yer almış məqalədə avropalılar tərəfindən hələ XVII əsrdə Osmanlı türklərinə qarşı bioloji silah hazırlanması planlarından bəhs edilir. Jurnala müsahibə verən yunan tarixçiləri Yeleni Talassinu və həmkarları bu faktı 1649-1651-cı illərə aid məktubları araşdırarakən aşkarladıqlarını bildirirlər. 
Məktublardan görünür ki, Xorvatiyadan olan həkimlər taun qurbanlarının bubonlarının, yəni xəstələrinin qasığındakı limfa vəzlərinin iltihabının nəticəsində yaranmış irinlərin həll edildiyi məhlullardan istifadə etməyi məsləhət görüblər. Venetsiyaya göndərilmiş məktubda Osmanlı imperiyasına satışa göndərilən toxuculuq məhsullarına həmin məhlulun hopdurulması təklif edilib.

İnsan qasığında taun bubonları

Məktubların göndərildiyi illərdə Osmanlı imperiyası venesiyalıların Krit adasında yerləşən Kandii qalasını mühasirəyə almışdı. Bu, tarixin ən uzun sürən mühasirəsi sayılır. 
Venesiya respublikasının ali tribunalına Dalmasiya və Albaniya baş canişinindən göndərilmiş məktublarda həkim Mikelancelo Salamonun planlarından bəhs edilir. Həkim Albaniyadan Osmanlıya göndərilən fəslərə, yəni Osmanlı türklərinin geyindiyi zoğalı rəngli papaqlara taunlu məhlulun hopdurulmasını məsləhət görür. Plana görə, fəslərin doldurulduğu gəmilər mühasirədə olan Kandi qalasına, həmçinin Kritdə olan digər Osmanlı düşərgələrinə göndərilməli idi. Türk hərbçilər yaxınlaşanda gəmilər yükləri qoyaraq qaçmalı idilər. 

Osmanlıda qırmızı fəs geymiş zabitlər və məmurlar 

Həmin günlərdə hesab edilirdi ki, taun insanlara yoluxmuş paltar vasitəsi ilə keçir. Müasir elmə görə isə taun siçanlarda parazitlik edən Versina pestis bakteriyaları tərəfindən yayılır. Xəstəliyin yayılması siçan - bit - insan sxemi ilə gedir.
Venesiya respublikasının ali tribunalı Mikelancelo Salamonun həmin planını bəyənib və gerçəkləşdirilməsini həkimin özünə həvalə edib. "Vəba məhlulu” hazırlanıb, amma 1649-cu ildə yay kampaniyasının sonuna kimi onu çiləmək mümkün olmayıb.

Rusiyanın S-400 raketləri 

Göründüyü kimi, 465 il qabaq Venesiya respublikasının Osmanlıya qarşı hazırladığı kütləvi qırğın silahı planı uğursuz nəticələnib. Bəlkə də, "Historical Review” jurnalının məqaləsi barədə bu gün xəbər yerləşdirən rus portalları Osmanlıya qarşı bu tarixi uğursuzluqla bağlı məqalə dərc etməklə Rusiyanın Suriyaya S-400 raketi yerləşdirməsinə işarə edib. Dünən Vladimir Putin Fransa lideri Ollandla görüşü zamanı bildirib ki, həmin raketlər Suriya üzərində bütün hava məkanına nəzarət edəcək. Rus portallar isə bu silahın da tarixi "taun məlhəmi” kimi uğursuz olacağına işarə vururlar.