Mətbuatda Sumqayıt şəhər 6 nömrəli orta məktəbin direktoru İradə Məmmədovanın təhsil müəssisəsinin foyesində olan Milli Qəhrəmanların fotolarından ibarət stendi zirzəmiyə atması barədə məlumat yayılıb.
Məlumatda direktor İ. Məmmədovanın stendin məktəbin foyesində ümumi mənzərəni korladığını əsas gətirərək bu addımı atdığı iddia olunur. Həmçinin o da bildirilir ki, sözügedən məktəbin müəllimləri və direktor müavini bu məsələyə etiraz edib və nəticədə direktor müavini işdən çıxarılıb.
Məsələylə bağlı 6 nömrəli orta məktəblə əlaqə saxladıq. Məktəbin direktoru İradə Məmmədova Xeberle.com-a yayılan informasiya ilə bağlı bunları deyib: "Məktəbdə yeni tədris ilinin başlanması ilə əlaqədar olaraq təmir işləri aparılıb. Sözügedən stend 2008-ci ildə tərtib olunub. Divardan çıxarılsa da sonradan yenisi ilə əvəz olunub. Foyedə 20 Yanvar, Xocalı faciələrini, eləcə də 31 mart soyqırımını özündə əks etdirən stendlər var . Milli Qəhrəman Çingiz Mustafayev və Mübariz İbrahimovla bağlı da plakatlarımız var. Köhnə stendlər isə arxivə qoyulub. Direktor müavini isə tutduğu vəzifədən azad edilməyib".
Xədicə Səxavətqızı
Xeberle.com
Xəbərdən istifadə edərkən istinad etmək vacibdir.