Bu gün Birləşmiş Ərəb Əmirliklərində (BƏƏ) "Şəhid günü" kimi qeyd edilir.
Xeberle.com Milli.Az-a istinadən xəbər verir ki, BƏƏ-nin Dövlət başçısı Əla-həzrət Xəlifə ibn Zəid Əli Nəhyanın göstərişi ilə 30 noyabr tarixi hər il bu ölkədə "Şəhid günü" kimi qeyd olunur.
Bu münasibətlə Əbu-Dabi taxt-tacının vəliəhdi və silahlı qüvvələrin baş komandanının müavini Əla-həzrət Şeyx Məhəmməd ibn Zəid Əli Nəhyanın göstərişlərinə əsasən, Əbu-Dabidəki vəliəhdin divanında şəhid ailələrinin işləri üzrə ofisdə BƏƏ-də mövcud olan bütün rəsmi dairələrlə əməkdaşlıq çərçivəsində bütün şəhidlər mütəmadi şəkildə anılacaq və onların ailələri şərəfləndiriləcəkdir.
BƏƏ-nin Azərbaycandakı səfirliyindən Milli.Az-a bildiriblər ki, "Şəhid günü" BƏƏ-də həyatlarını vətən uğurunda qurban vermiş şəxslərin şanlı həyat yolunun bir daha xatırlanması, şəhid ailələrinə dəstək, şəhidlərin xatirəsini əbədiləşdirmək kimi mənəvi-əxlaqi hissləri əhatə etməklə yanaşı, həm də onların qəhrəmanlıq səlnamələrini bir daha dilə gətirmək üçün minbər rolunu oynayır: "Günahsız şəhidlər Vətənin bayrağını yüksəklərə qaldırmaq, Vətən torpağında sülh və əmin-amanlığın bərqərar olması üçün həyatlarını qurban verərək əlçatmaz məqama yüksəlmişlər".
Qeyd edək ki, bu ilin noyabr ayında ölkədə "Şəhid günü" çərçivəsində "Fəxr və qürur", "Şəhidlərin xatirəsinin əbədiləşməsi", "Milli birlik" və "Vətən uğurunda həyatını qurban vermək dəyərlərinin möhkəmlənməsi" mövzularında çoxlu tədbir və təşəbbüslər həyata keçirilir.
BƏƏ-də hesab edirlər ki, şəhidlər gələcək nəsil üçün əsl örnək məktəbi və Vətəni sevməyin ən gözəl nümunəsidir. Burada "Şəhid günü" - canlarını Vətən naminə qurban verən şəhidlərlə fəxr etmə və onların şanlı həyat yolundan qürur duymaq, həyatlarını fəda edən ata-babaların qəhrəmanlıq dolu irsinin yeni nəsil tərəfindən davam etdirilməsinin onların nəzərinə çatdırılması, xalq və dövlət rəhbərliyi arasında böyük birliyin olması, şəhid anasının, atasının və ailəsinin rolunun və onların yüksək mənəvi dəyərlərinin ön plana çıxarılması, ölkəni xarici qüvvələrdən qoruyan Vətən övladlarına xüsusi diqqət və qayğının göstərilməsinin nəzərdə saxlanılması deməkdir.
Xəbərdən istifadə edərkən istinad etmək vacibdir.