Sentyabrın 16-da İqtisadi Zonaların İnkişafı Agentliyinin Peşə Təhsil Mərkəzində 2024/2025-ci il tədris ilinin başlanması və 15 sentyabr – "Bilik günü” münasibətilə tədbir keçirilib.
Azərbaycan Respublikasının suverenliyi və ərazi bütövlüyü uğrunda həlak olmuş şəhidlərimizin xatirəsi bir dəqiqəlik sükutla yad edildikdən və Dövlət Himni səsləndirildikdən sonra Peşə Təhsil Mərkəzinin direktoru Kənan Bağırov çıxış edərək "Bilik günü” münasibətilə tələbələri təbrik edib, onlara təhsil həyatında uğurlar arzulayıb.
Bildirilib ki, 2024/2025-ci tədris ili üçün Peşə Təhsil Mərkəzinə 13 ixtisas üzrə 329 nəfər tələbə qəbulu həyata keçirilib.
Həmçinin ölkəmizdə keçiriləcək COP29 ili çərçivəsində ilk dəfə olaraq peşə təhsil sistemində yeni ixtisas "Alternativ enerji qurğu və avadanlıqlarının istismarı” yaradılıb ki, bu ixtisas üzrə də İZİA-nın Peşə Təhsil Mərkəzinə 20 nəfər tələbə qəbul olub.
Ümumilikdə İqtisadi Zonaların İnkişafı Agentliyinin nəzdində Peşə Təhsil Mərkəzində hazırda 427 nəfər tələbə təhsil alır.
Xəbərdən istifadə edərkən istinad etmək vacibdir.
