Şücaəti ilə Tarix yazan Milli Qəhrəman Anar Şükürovun adını daşıyan məktəbdə bir bayram əhval-ruhiyyəsi var idi…

Tədbirə təşrif buyuran qonaqlar əvvəlcə məktəbin foyesində təşkil olunan sərgi ilə tanış oldular. Şagirdlərin əl işlərindən ibarət olan sərgi və nümayiş olunan rəsm əsərləri hər kəsin diqqətini cəlb etdi. Anar Şükürovun həyat və döyüş yolunu əks etdirən fotolarla zəngin olan muzeylə tanışlıqdan sonra, qəhrəmanın anası Emma xanımla xatirə şəkilləri çəkildi.

Tədbir Dovlət Himninin səslənməsi ilə başladı. Daha sonra Azərbaycanın azadlığı və bütövlüyü uğrunda canlarından keçən Şəhidlərimizin əziz xatirəsi bir dəqiqəlik sükutla yad edildi. Rəngarəng proqram hər kəsin ürəyincə oldu; Ulu Öndərə, onun layiqli davamçısı olan Olkə başçısı İlham Əliyevə, doğma şəhərin dünəni və bu gününə, əmək qəhrəmanlarına həsr olunan video-çarx nümayiş olundu, məktəbin 7a, 7b, 8a, 9c və 10ç sinif şagirdlərinin ifasında şeirlər səsləndi, səhnəciklər göstərildi, mahnılar oxundu. Daha sonra qonaqların çıxışları oldu, Sumqayıtın inkişaf tarixinə nəzər salındı, ötən illər xatırlandı, Vətən müharibəsi igidlərinin şücaətindən söz açıldı,Tarixdə görünməmiş bir Zəfərin sevinci yaşandı…

Abşeron-Xızı Regional Təhsil İdarəsinin Sumqayıt sektor müdiri İman Ağayev, məktəbin direktoru işləmiş şair Əvəz Mahmud Lələdağ; Elm vəTəhsil Nazirliyinin İctimaiyyətlə Əlaqələr şöbəsinin əməkdaşı Gülbahar Ülkər; SDU-nun müəllimi, Əməkdar jurnalist, şair-publisit Aftandil Məmmədov; Vətən müharibəsi Şəhidi Anar Şükürovun anası Emma xanım və Şəhid Rüfət Əhmədzadənin anası Ruhiyyə xanım, Vətən müharibəsində Şuşada ilk bayrağı dalğalandıran polkovnik Rəşad Aslanov; qazi, mayor Nəsir Zeyniyev, məktəbin məzunu, gənc şair-qiraətçi, AYB-nin üzvü Elvin Əlizadə öz ürək sözlərini söylədikdən sonra, yüksək səviyyədə təşkil olunan tədbirə görə, məktəbin rəhbərliyinə, tədbirin təşkilatçısı Hüsniyyə İbrahimovaya dərin minnətdarlıqlarını bildirdilər, şagirdlərə tövsiyələrini verdilər.

Tədbirin sonunda məktəbin direktoru Ayna Fleydanlı tədbirin təşkilatçısına və zəhməti keçən hər kəsə, həmçinin dəvəti qəbul edib təşrif buyuran qonaqlara təşəkkürünü bildirdi.

Həmin günün xoş xatirəsi şəkillər çəkilməklə tarixin yaddaşına həkk olundu.

P.S.: Biz də, öz növbəmizdə, Sumqayıtın Yubileyi münasibətilə bütün sumqayıtsevərləri, həmçinin tədbirin təşkilatçısı, ssenari müəllifi, məktəbin İngilis dili müəllimi,”Əməkdar müəllim”adını şərəf və ləyaqətlə daşıyan, bir çox Dövlət mükafatlarının sahibi olan Hüsniyyə müəlliməni uğuruna görə ürəkdən təbrik edir, məktəbin direktoru Ayna xanım başda olmaqla, peşəkar, yaradıcı, mehriban kollektivə şagirdləri ilə birlikdə bol uğurlar, sağlam ömür arzulayırıq!

Aygün Hacıyeva,

Jurnalist, yazıçı-publisist,

AJB, AYB və AAB-nin üzvü