Əsası Sumqayıt şəhərində qoyulmuş Panda School Məktəbəqədər Hazırlıq şəbəkəsinin Bakı filialının açılış mərasimi keçirilib.
Açılış mərasimində Bakı filialının direktoru Kamal Nağılı əsas məramın vətənimizin övladlarına daha təkmil məktəbəqədər təhsil vermək, gələcək nəsillərimizin təhsilinin bünövrəsini düzgün qoymaq olduğunu vurğulayıb. Sonra Panda School Məktəbəqədər Hazırlıq şəbəkəsinin rəhbəri Elvin Dadaşov qeyd edib ki, məktəblər açmaq həbsxanaların qapılarını bağlamaq deməkdir. O, özünün və komandasının tutduqları yolda var güclərini ortaya qoyacaqlarını, növbəti illərdə daha çox xarici təcrübəni ölkəyə gətirəcəklərini vəd edib.
Qeyd edək ki, Panda School ilk dəfə 2013-cü ildə Yaponiya və İtaliya məktəbəqədər hazırlıq proqramlarının təcrübəsini Azərbaycan Respublikasının Təhsil Nazirliyinin Məktəbəqədər Təhsil haqqında Nizamnaməsinə uyğunlaşdıraraq gücləndirilmiş proqram yaradıb. Bu proqram qısa müddətdə öz effektini verib. 3 il ərzində Panda School-un 5 filialı açılıb, yüzlərlə Azərbaycan övladlarına fərqli məktəbəqədər təhsil verilib. Ötən illərdə məktəbəqədər hazırlıq proqramının məzunu olmuş balacaların hamısı hazırda əlaçı kimi məktəblərdə təhsillərini davam etdirirlər.