Bu günlərdə Azərbaycan xalqı Böyük ZƏFƏRin sevincini qürurla yaşayır. Bu Qalibiyyətə imza atanlardan biri də İman və Bəhrəm Məmmədzadə qardaşlarıdır.
Azərbaycanın azadlığı və bütövlüyü uğrunda gedən mübarizədə canlarından, qanlarından keçən qəhrəman oğullar heç zaman unudulmayıb, unudulmur və unudulmayacaqlar!
Sumqayıt şəhər 9 saylı tam orta məktəbin 8A sinfi Şəhid İman və Bəhrəm Məmmədzadə qardaşlarının adını daşıyır. Məktəbin pedaqoqu Vüqar Abdullayev rəhbərlik etdiyi 8A sinfinin şagirdləri və valideynlərlə birlikdə, Vətən müharibəsində şücaətləri ilə TARİX yazan, eyni gündə Şəhidlik Zirvəsinə ucalan qardaşların Anım günündə valideynlərə dəstək olmağa, şəhidlərin yaşadıqları evin qarşısında salınan parkda memorial kompleksin açılışında iştirak etməyə tələsdilər.
Kollektiv əvvəlcə qəsəbənin girişindəqardaşların şərəfinə salınmış xatirə güşəsinə gül dəstələri qoydular, daha sonra tədbirə üz tutdular.
Anım tədbirində təkcə kənd camaatı, İcra nümayəndəliyi, qardaşların təhsil aldığı ocaqların şagird, tələbə, müəllim kollektivi deyil, onların hərbçi yoldaşları, rəsmi qurumların və QHT, media nümayəndələri, incəsənət ustaları, həmçinin yüzlərlə insanlar iştirak edirdi.
İman və Bəhrəm Məmmədzadə qardaşları çıxışçılar tərəfindən xoş xatirəylə yada salındılar. Memar Hüseyn Haqverdiyevin hazırladığı abidə kompleksin ağ örpəyini qəhrəman qardaşların valideynləri açdılar. Tədbir boyunca tərtib olunmuş monitorda qardaşların həyat hekayəsini, şərəfli döyüş yolunu əks etdirən videoçarxın nümayişi (müəllif Mehrab bəy) tədbirə xüsusi rəng qatdı. Hər zaman Şəhid ailələrinin yanında olan bəstəkar Ruslan Səfərovun Vətənə, Torpağa, İgid oğullara həsr olunmuş mahnıları, səslənən şeirlər bir-birini əvəz etdi. Hərbi orkestrin müşayiəti ilə ifa olunan mahnılar iştirakçılar tərəfindən alqışlarla qarşılandı.
Tədbirdə sumqayıtlı şagirdlər də söz deməyi unutmadılar. Onlar, Vüqar müəllimin çıxışından sonra, qəhrəmanlara, Zəfərə həsr olunmuş şeirlər səsləndirdilər. Tədbir qardaşlara həsr olunmuş müsiqi ilə sonlandırıldı. Çəkilən şəkillər o günün yaddaşına unudulmaz xatirə kimi həkk olundu.
Tədbirdən sonra Vüqar müəllim şagird və valideynlərlə birlikdə Şəhid qardaşların ev muzeyində oldu. Burada şəhid qardaşların divarboyu şəkilləri yer almış, masa üzərində şəxsi əşyaları düzülmüş, idmanda qazandıqları təltifləri, döyüşlərdə göstərdikləri şücaətə görə verilən medalları... yer almışdı. Daha sonra Binə Şəhidlər Xiyabanında, İman və Bəhram qardaşları ilə birlikdə, bütün Qəhrəman oğullar anıldı, onların məzarları üstünə tər qərənfillər düzüldü...
------------------------------------------------------------------------------
Qısa ARAYIŞ:
İman Məmmədzadə 14.09.1998-ci ildə, Bəhrəm Məmmədzadə 18.04.2000-ci ildə Lerik rayonunda anadan olublar. Xəzər rayonu Binə qəsəbəsindəki 117 saylı tam orta məktəbdə oxuyublar. Hər ikisi ali təhsilini Rusiyada alıblar. Vətənpərvər olan yeniyetmələr uşaq yaşlarından idmanla məşğul olublar; İman ağır atletika, Bəhrəm cüdo ilə. Hər ikisi dəfələrlə yüksək mükafatlara layiq görülüblər. Ali təhsildən sonra qardaşlar Vətənə dönüblər. 2019-cu ilin iyun ayında qardaşlar Qusar rayonunun "N” saylı hərbi hissəsində həqiqi hərbi xidmətə başlayıblar.
Hərbi xidmərdə olan qardaşlar 2020-ci il oktyabrın 27-də Xocavənd rayonunun Qırmızı Bazar ətrafında gedən gərgin döyüşlər zamanı şəhid olublar.
Hər iki qardaş, Azərbaycan Respublikasının prezidenti cənab İlham Əliyevin müvafiq Sərəncamları ilə, "Vətən uğrunda”, "Xocavəndin azad olunmasına görə”, "Cəbrayılın azad olunmasına görə” və "Füzulinin azad olunmasına görə” medalları ilə təltif edilib.
-----------------------------------------------------------------------
Bəli, illər, əsrlər keçəcək, bəlkə də çox şey dəyişəcək, unudulan unudulacaq, lakin zamanın yaddaşından silinməyəcək bir ad qalacaq – ŞƏHİD adı! Allahın SEÇİLMİŞLƏRi olan ŞƏHİDLƏRimiz, könüllərin sultanı olaraq, hər zaman xoş xatirəylə yad ediləcəklər! ŞƏHİDLƏR – hər zaman qulaqlarda səslənəcək ƏBƏDİYYƏT SİMFONİYASIdır!
Ruhunuz şad olsun Cənnətməkan Şəhidlərimiz!!!
Aygün HACIYEVA,
Jurnalist, yazıçı-publisist,
AJB, AYB və AAB-nin üzvü.
Xəbərdən istifadə edərkən istinad etmək vacibdir.
