Bəzi mağazalarda, restoranlarda və iaşə obyektlərində ödəniş POS-terminalla deyil, kartdan karta köçürməklə təklif olunur. Azərbaycanda son dövrlər nağdsız ödənişlərdən yayınmanın ən populyar üsuluna çevrilmiş pulun kartdan karta göndərilməsini istəyən obyekt sahiblərini sərt cəzalar gözləyir. Təəssüf ki, bu cür iaşə obyektləri Sumqayıt şəhərində də az deyil. Keçirdiyimiz sorğudan belə qənaətə gəlmək olar ki, Sumqayıtın əksər kafe və restoranları gizli də olsa, hələ də müştəriləri müxtəlif bəhanələrlə "kartdan karta” üsulu ilə hesabı ödətdirirlər. Keçirdiyimiz sorğuda "Gənclik City", "Newport Novxanı", "Musfir" kimi restoranların adları qeyd edilib.

İstehlakçılar tərəfindən bank kartları vasitəsilə ödənişlərin icra olunması istənildikdə, sahibkarlar tərəfindən guya POS-terminalların işləməməsi və ya enerjisinin olmaması barədə müxtəlif bəhanələr gətirilir.
Lakin vətəndaşlar kassa çekini almamaqla pulu öz kart hesablarından sahibkarın kart hesabına göndərməklə, sabah həmin mallarda yaranmış defekti və çatışmazlığı mağazaya sübut edə bilməyəcək. 


Azad İstehlakçılar Birliyinin sədri Eyyub Hüseynov Xeberle.com-a açıqlamasında bildirib ki, bu hallarda qəbzlər verilmədiyinə görə, vətəndaşın şikayəti olsa belə onun hüquqlarını müdafiə etmək olmur:
"Bir sıra marketlərdə, xəstəxanalarda verilən qəbzlərin keyfiyyətsiz olması, bu səbəbdən vətəndaşların ƏDV yükləyə bilməmələri barədə mənə daim telefon zəngləri gəlir. Vətəndaş deyəndə ki, kartla ödəniş etmək istəyirəm, deyirlər "onda pulu VÖEN-ə bağlı olmayan şəxsi bir karta köçür”. Belə yerlərin əksəriyyətində guya POS-terminal işləmirmiş kimi çoxlu bəhanələr gətirirlər. Bu cür ticarət yerləri vətəndaşların hüquqlarını pozmaqla dövlətin sosial siyasətinə də zərbə endirir. Belə hallarla qarşılaşan istehlakçılara "195” qaynar xəttinə zəng edərək İqtisadiyyat Nazirliyinə məlumat vermələrini tövsiyə edirəm”.


POS-terminalların quraşdırılmaması, quraşdırılmış obyektlərdə isə nağdsız ödənişlərin qəbulundan imtina edilməsinə görə 6 min manatadək cərimə nəzərdə tutulub.
İqtisadiyyat Nazirliyi yanında Dövlət Vergi Xidmətinin "Card to card" (Kartdan karta) üsulu ilə bağlı sahibkarlara müraciətində bildirilir ki, dəfələrlə edilmiş xəbərdarlıqlara və aparılan məlumatlandırma işlərinə baxmayaraq qeyd olunan qanuna zidd hallar hələ də davam etdiyi üçün bu istiqamətdə vergi nəzarəti tədbirləri gücləndirilib. Dövlət Vergi Xidməti bir daha sahibkarlıq subyektlərinin nəzərinə çatdırır ki, POS-terminal quraşdırılması məcburi olan obyektlərdə POS-terminalların quraşdırılmamasına və POS-terminallar quraşdırılmış obyektlərdə nağdsız ödənişlərin qəbulundan imtina edilməsinə görə təqvim ili ərzində belə hallara 1-ci dəfə yol verildikdə 1 000 manat, 2-ci dəfə yol verildikdə 3 000 manat, üç və daha çox dəfə yol verildikdə isə 6 000 manat maliyyə sanksiyaları tətbiq olunur.
O da qeyd olub ki, bununla əlaqədar sahibkarlara Vergi Məcəlləsində nəzərdə tutulan maliyyə sanksiyalarına məruz qalmamaq üçün nağdsız ödənişləri qanunvericiliyin tələblərinə əsasən, yalnız POS-terminal vasitəsilə qəbul etmək tövsiyə olunur. Eyni zamanda, Dövlət Vergi Xidməti vətəndaşları mal, iş və xidmətlər alarkən nağdsız ödənişləri kartdan karta köçürmə əməliyyatları ilə deyil, yalnız POS-terminal tələb etməklə həyata keçirməyə çağırır.


Elşən Yəhyayev