DOST Agentliyi konkret sualdan şablon cavabla yayındı
Sumqayıtda Heydər Əliyev parkının çıxış hissəsində, "Bravo” supermarketin arxasında tikinti işlərinin aparılması bir müddətdir ki, şəhər sakinlərinin marağına səbəb olub. Artıq ərazinin hasarlanması işlərinə də başlanılıb. Parkda aparılan tikintiylə bağlı şəhər sakinləri də Xeberle.com-a tez-tez suallar ünvanlayır.
Bəs görəsən, sumqayıtlıların ən çox üz tutduğu yerlərdən biri Heydər Əliyev parkında nə tikilir?
Mövzu ilə bağlı Sumqayıt şəhər İcra Hakimiyyəti ilə əlaqə saxladıq. Qurumdan bildirildi ki, ərazidə kommunikasiya xətlərinin yeri dəyişdirilib.
Xeberle.com-un əldə etdiyi məlumata görə, sözügedən parkda Əmək və Əhalinin Sosial Müdafiəsi Nazirliyinin tabeliyindəki "DOST Mərkəzi" tikilir. Bu səbəbdən ərazi hasara alınıb. Dayanıqlı və Operativ Sosial Təminat Agentliyi 2023-cü ildə tikintinin aparılması ilə də bağlı açıq tender elan edib. Agentlik platforma üçün 140 min manat ödəyəcək. Müqavilənin icrası müqavilə imzalandıqdan sonra 15 ay müddətində nəzərdə tutulmuşdur.
Məsələ ilə bağlı Dayanıqlı və Operativ Sosial Təminat Agentliyi ilə əlaqə saxladıq. Lakin suallarımıza cavab verilmədi. Xeberle.com olaraq konkret sual ünvanlasaq da, şablon və sualımıza aidiyyəti olmayan cavab aldıq. Cavabı olduğu kimi təqdim edirik: "DOST mərkəzləri barədə məlumatlar ƏƏSMN-nin, eləcə də DOST Agentliyinin rəsmi saytında və sosial media hesablarında mütəmadi olaraq dərc olunur. Həmin kommunikasiya kanallarını izləyərək yeniliklər barədə məlumat əldə edə bilərsiniz”.
Elşən Yəhyayev
Xəbərdən istifadə edərkən istinad etmək vacibdir.
