Ölkəmizdə qan xəstəlikləri ilə mübarizə və könüllü qan donorluğunun inkişafı sahəsində yeganə milli cəmiyyət olaraq fəaliyyət göstərən Qan Donorları Assosiasiyası hər il olduğu kimi bu il də mövzu ətrafında ictimai maarifləndirmə görüşünun keçirilməsi təşəbbüsünü irəli sürüb.
Əhalinin sağlamlığının qorunması Azərbaycanda həyata keçirilən sosialyönümlü siyasətin mühüm tərkib hissəsidir. Azərbaycan Prezidentinin təşəbbüsü ilə səhiyyənin ən vacib sahələr üzrə hazırlanmış Dövlət Proqramları uğurla həyata keçirilir. İrsi qan xəstəlikləri ilə bağlı Heydər Əliyev Fondunun həyata keçirdiyi layihələrin əhəmiyyəti isə xüsusi vurğulanmalıdır. 2006-cı ildən etibarən həyata keçirilən bu proqramlar çərçivəsində 4000-dək talassemiyalı, 1800-dək hemofiliyalı xəstənin problemi həllini tapmış, pasientlər təmənnasız şəkildə uyğun müalicə və müayinə ilə təmin olunublar.
16 aprel tarixində Azərbaycan Milli QHT Forumunun dəstəyi, "Qan Donorları Assosiasiyası” İctimai Birliyinin təşkilatçılığı ilə keçirilən dəyirmi masa ətrafında ictimai müzakirə və maariflənmə görüşündə vətəndaş cəmiyyəti nümayəndələri, hemofiliyalı pasientlər, media və dövlət rəsmiləri iştirak edib. Görüş zamanı ölkədə hemofiliyalı şəxslərin cəmiyyətə inteqrasiyası və onların sağlamlığının qorunması istiqamətində atılan addımlar müzakirə olunub.
Xatırladaq ki, dünyada 800 mindən çox hemofiliya xəstəsi var və 17 aprel dünyada beynəlxalq hemofiliya günü kimi qeyd olunur. 1989-cu ildən etibarən həmin gün Dünya Hemofiliya Federasiyasının və Dünya Səhiyyə Təşkilatının təşəbbüsü ilə ictimaiyyətin diqqətini bu xəstəlikdən əziyyət çəkən insanların problemlərinə cəlb etmək məqsədi daşıyır. Həmin gün beynəlxalq aləmdə xəstələrin həyat keyfiyyətini yaxşılaşdırmağa yönəlik çağırışla müxtəlif tədbirlər keçirilir, dünyanın məşhur memarlıq abidələri al qırmızı rəngə boyanır.
Xəbərdən istifadə edərkən istinad etmək vacibdir.
