Xəbər verdiyimiz kimi, Sumqayıt şəhəri 18-ci mikrorayon 46-cı binanın sakinləri hər yağış yağanda əlacsız duruma düşürlər.Xeberle.com-a müraciət edən 1-ci blok sakinləri bildirirlər ki, binanın damından navalçaların düzgün quraşdırılmaması səbəbindən yağıntılı havada yağış suları damdan fasad boyunca 1-ci mərtəbəyədək axaraq, pəncərələrdən mənzillərə daxil olur.
Sakinlərin redaksiyamıza təqdim etdiyi görüntülərdən də aydın olur ki, onlar yağış sularının qarşısını almaq üçün müxtəlif tədbirlər görür, yağış suyunun qarşısını almağa çalışırlar. Sakinlər dəfələrlə MİS-ə müraciət etsələr də, heç bir nəticə olmayıb. MİS işçiləri qeyd edib ki, olaya səbəb binaya dam quraşdırılan zaman yağış sularının düzgün idarə edilməməsidir.
Məsələylə bağlı Sumqayıt şəhər icra hakimiyyəti ilə əlaqə saxladıq. Qurumdan Xeberle.com-a bildirilib ki, sözügedən ünvanda qeydə alınan problem növbəti həftə ərzində aradan qaldırılacaq:
"Sumqayıt şəhəri ərazisində bu sahədə sakinlərin müraciəti əsasında mövcud problemlər mərhələli şəkildə həll olunur. Həmin ünvandada şikayət artıq qeydiyyata alınıb və gələn həftə ərzində həmin problem aradan qaldırılacaq".
Xəbərdən istifadə edərkən istinad etmək vacibdir.
