11 dekabr 2025-ci il tarixində Heydər Əliyev Mərkəzi-ndə Böyük Britaniya Səfirliyinin təşkilatçılığı ilə keçirilən "Sustainable Cities: Art and Architecture” beynəlxalq memarlıq-dizayn müsabiqəsinin yekun təqdimat mərasimi baş tutmuşdur. Müsabiqə şəhər mühitində su qıtlığı, enerji keçidi və davamlı urbanistikanın gələcək perspektivlərinin araşdırılmasına həsr olunmuşdur.
"Memarlıq” ixtisasında təhsil alan tələbələr Baku White City kontekstində su resurslarının idarə olunması və ekoloji davamlılıq mövzusunda konseptual layihələr hazırlamış, işlər iki mərhələli beynəlxalq qiymətləndirmə əsasında seçilmişdir. Final mərhələsində layihələr Böyük Britaniyadan olan 38 memar tərəfindən dəyərləndirilmişdir.
Təqdimat mərasimində Böyük Britaniyanın Azərbaycandakı səfiri Fergus Ould çıxış edərək müsabiqənin əhəmiyyətini vurğulamış və xüsusilə Memarlıq kafedrasının müdiri, dosent Gülər Məmmədovanın adını qeyd etmişdir. Səfir tələbələrin müsabiqədə fəal iştirakını, proses boyu yüksək təşkilati əlaqəni və layihələrin keyfiyyətli təqdimatını məhz Gülər Məmmədovanın rəhbərliyi və davamlı koordinasiyası ilə əlaqələndirmiş, bu əməkdaşlığı yüksək qiymətləndirdiyini bildirmişdir.
Tədbirdə Akademiyanın rektoru Natiq Əliyev, prorektorlar və müəllim heyəti də iştirak etmişdir.
Ümumilikdə 17 tələbə tərəfindən 11 layihə təqdim olunmuşdur. Nəticələrə əsasən I yerə Məmmədova Seyidfatimə Natiq və Ağaməmmədova Mədinə Bəxtiyar, II yerə Quliyeva Emiliya Mustafa və Məmmədova Sabirə Zaur, III yerə isə Əlizadə Gülər Elxan və Əliyeva Türkan Şirzadovna layiq görülmüşdür.
Müsabiqə tələbələrin ekoloji problemlərə yaradıcı yanaşma bacarıqlarını və urbanistikanın gələcəyinə dair innovativ baxışlarını nümayiş etdirməklə yanaşı, beynəlxalq platformada Azərbaycan memarlıq təhsilinin potensialını da uğurla təqdim etmişdir.
Xəbərdən istifadə edərkən istinad etmək vacibdir.
