Bu gün ölkəmizdə qadınların cəmiyyətdəki yeri və rolu həm xalqımızın öz mental ənənələrinə bəslədiyi hörmət, həm də dövlətimizin yeritdiyi siyasət sayəsində yüksək qiymətləndirilir. Çağdaş Azərbaycan qadını ana olmaqla yanaşı, həm də bacarıqlı siyasətçi, deputat, dövlət məmuru, uğurlu iş adamıdır. Bu fəallıq Azərbaycan qadınının malik olduğu tarixi ənənələrlə yanaşı, ölkəmizdə həyata keçirilən gender siyasətinin mahiyyətindən, qadınlara cəmiyyətin tamhüquqlu üzvü kimi bütün imkanlardan bərabər istifadə üçün zəruri şəraitin yaradılmasından irəli gəlir. Bu xüsusda sahibkarlıq fəaliyyəti ilə məşğul olan zərif cinsin nümayəndələri son zamanlar daha çox gözə çarpır. Onlar daha çox sosiallaşır, tematik birliklərə qoşulur, şəbəkələşir, müxtəlif yerli və beynəlxalq platformalarda birgə çıxış edirlər. Belə mərkəzlərdən biri kimi "Adalia" Beynəlxalq Qadın Platforması xüsusi diqqət çəkir.
Mövzunun aktuallığını nəzərə alaraq, platformanın təsisçisi Dilşad Əhədova ilə görüşüb söhbətləşdik.
HAŞİYƏ: 17.06.1983-cü il təvəllüdlü Dilşad Əhədova Azərbaycan Dillər Universitetində dilşünas-tərcüməçi ixtisası üzrə ali təhsil alıb. Sahibkarlıq və ünsiyyət bacarıqları üzrə təlimçi kimi fəaliyyət göstərir. Uşaq və qadın inkişafına yönəlmiş bir sıra sosial təşəbbüslərin qurucusu və rəhbəridir. "Dəcəl Balam” uşaq inkişaf mərkəzinin, "Adalia" Beynəlxalq Qadın Platformasının, "Adalia" MMC-nin təsisçi direktoru və "Tərəqqi” Sosial İnkişaf İctimai Birliyinin icraçı direktoru vəzifələrini daşıyır.
Özünün də dediyinə görə fəaliyyəti insan potensialının üzə çıxarılmasına və onların gücləndirilməsinə yönəlib. Qadınların cəmiyyətdə daha fəal rol alması və uşaqların yaradıcı inkişafı onun üçün xüsusi önəm daşıyır. Müxtəlif seminar və layihələrlə insanlara ilham verməyə çalışır. Dürüstlük, sosial məsuliyyət və davamlı inkişaf əsas dəyərləridir. Həyatının əsas məqsədi fərdi və sosial dəyişikliklərə töhfə verməkdir.
- Adalia Beynəlxalq Qadın Platforması yaratmaq ideyası necə yarandı?
- 2025-ci ilin əvvəlində Türkiyədən bir təklif gəldi. Sadəcə o təklifə razılaşmaq üçün qadınlarla bağlı bir təşkilat, bir dərnək və ya platforma olmalı idi. Elə oldu ki, yanvar ayında "Qadın Dialoq Məktəbi” layihəsinə qoşuldum. Hər kəs qadınlarla bağlı müxtəlif fəaliyyət planı hazırlamalı və təqdim etməli idi. Layihə çərçivəsində 20 xanımdan, 10 xanım seçildi. Kurs müddətində sülh danışıqlarında beynəlxalq qadın ekspertlərin yetişdirilməsi istiqamətində müxtəlif təlimlər keçirilirdi. Özümü beynəlxalq danışıqlarda tapdım. Hazırda xüsusi mentorlardan dərs alırıq, nəticədə də 10 xanımdan yalnız 1 nəfəri beynəlxalq təqaüd qazanacaq. Mayın 20-də hətta layihə çərçivəsində platformanın təqdimatını edəcəm. Əminəm ki, o bir xanım mən olacam. Bizim layihə qalib seçiləcək.
Elə bu kursla yanaşı, "AccessBank”ın təşkil etdiyi "Access2success” layihəsinə seçildim. Səfərlərlə əlaqədar olaraq tam iştirak edə bilməsəm də, orda da yalnız xanımlar idi. İllər əvvəl də "Adalia” Beynəlxalq Qadın jurnalını da qeydiyyatdan keçirmişəm. Hələlik müxtəlif səbəblərdən çap etdirmək nəsib olmayıb. Beləliklə, 2025-ci il başlayandan bütün yollar qadınlarla bağlı fəaliyyətlərə gətirib çıxartdı. Və bu müddət ərzində sanki onlarla daha çox ünsiyyətdə oldum, ehtiyaclarını duydum. Bir sözlə, tələbata uyğun olaraq da adıçəkilən layihənin fəaliyyət planı çərçivəsində "Adalia" Beynəlxalq Qadınlar Platformasını yaratdım.
- Niyə "Adalia"? Kimdir, nədir o?
- Hər halda mənasını soruşursunuz (gülümsəyir). Loqodan da bəllidir ki, "Adalua” adı uğur böcəyi, parabüzənlə bağlıdır. İtalyanca tərcümədə bu mənanı daşıyır. Adın nəinki mənə, bizə, hətta, bizlə əməkdaşlıq edən hər bir kəsə uğur gətirəcəyinə inanırıq. Təcrübəyə əsasən də uğurlu olduğunun şahidiyik. Bunu əməkdaşlıq etdiyimiz şirkətlər, insanlar özləri etiraf edir. "Adalia" qanadlarında üzvlərimiz və əməkdaşlıq etdiyimiz tərəfdaşlarımızla birlikdə dünyanı fəth etmək niyyətindəyik.
- Bu platformanın yaradılmasında məqsəd nədir və kimlər qoşula bilər?
- Bu birlik qadınların şəxsi, sosial və peşəkar inkişafını dəstəkləmək, PR və media məsələlərinə kömək məqsədilə qurulub. Platforma qadınların öz potensiallarını kəşf etməsi, güclənməsi və cəmiyyətə aktiv töhfə verməsi üçün bir mərkəz rolunu oynayır. Sahəsi və peşəsindən asılı olmayaraq inkişaf etmək, fayda vermək və fayda görmək istəyən hər bir xanım platformaya üzv ola bilər.
- "Adalia"da hansısa təlim, kurs yaxud layihələr varmı?
- Burada müxtəlif mövzularda kurslar və təlimlər təşkil edirik. Bu təlimlər qadınların şəxsi inkişafı, peşəkar bacarıqları, ictimai iştirakçılığı və motivasiyanı gücləndirməyə yönəlib. Əsas təlim istiqamətlərimiz şəxsi inkişaf və liderlik, Peşəkar inkişaf və sahibkarlıq, Texnologiya və innovasiya, Sosial təşəbbüslər və ictimai layihələr, Sənət və yaradıcılıq sahələrini əhatə edir. Təlimlər həm offline, həm də onlayn formatda keçirilə bilir. Bəzi təlimlərimiz sertifikatlıdır və iştirakçılara rəsmi sənəd təqdim edə bilirik.
- Hansı qurumlar və tanınmışlarla əməkdaşlıq edir, yaxud nəzərdə tutursunuz?
- Platformanın yaranma tarixi çox qısadır. Əsas məqsədimiz tanınmış xanımları deyil, əksinə həm də bacarıqlı lakin kölgədə qalan, özünü təsdiq etməyən, dəstəyə və inkişafa ehtiyacı olan xanımlarımızı aşkarlayıb birliyə qoşmaqdır. Gələcəkdə təbii ki, planda dövlət qurumları ilə, əsasən Ailə, Qadın və Uşaq Problemləri üzrə Dövlət Komitəsi ilə əməkdaşlıq etmək niyyətindəyik. Bununla yanaşı, banklardan biri ilə əməkdaşlığı düşünürük. Hazırda danışıqlar gedir.
- Üzvlərinizin asudə vaxtı və əyləncəsi ilə bağlı hansı tədbirlər düşünmüsünüz?
- Bir insan, hələ qadın yaxşı dincəldikdə işinə dah çox fokuslana bilir. Bunu əsas tutaraq biz də asudə vaxtın səmərəli keçirilməsi və platformanın bir az əyləncə tərəfi olsun deyə xanımlarımız üçün açıq havada yoqa dərsləri keçiririk. Bu həftədən etibarən rəqs dərslərinə də başlayırıq. Bir qadın xoşbəxt olarsa, ailəsi də xoşbəxt olar. Ailə xoşbəxt olarsa, cəmiyyətə də təsir edər. Beləliklə xoşbəxtlik yayılar. Çalışırıq ki, xanımlarımız xoşbəxt olaraq iş görsünlər, fəaliyyət göstərsinlər.
- Hansı ölkələrlə əlaqələr qurmusunuz və xarici səfərlər planlaşdırılırmı?
- Yeni yaranmasına baxmayaraq Türkiyə, ABŞ, İngiltərə, Nigeriya, Qambiya, Almaniya, Özbəkistan və Hindistanla artıq əlaqələr qurulub. Bu ölkələrdən üzvlərimiz də var. Adından göründüyü kimi beynəlxalq platforma olduğundan yerli layihələrlə yanaşı, beynəlxalq səfərlərimiz çox olacaq. Artıq danışıqlar aparılıb.
- "Adalia"nı 3 il sonra necə təsəvvür edirsiniz?
- Eyni zamanda biz Adaliaplatform saytı üzərində də işləyirik. "Adalia" artıq təkcə sosial media hesabları ilə deyil, öz mobil tətbiqi və interaktiv veb platforması ilə qadınlara yönəlik inkişaf proqramları, mentorluq dəstəyi və şəbəkələşmə imkanları təqdim edəcək.
Azərbaycan və regionda qadınların inkişafı və təşəbbüskarlığının simvoluna çevrilən bir brend olacağına əminəm. Adalia Summit – hər il keçirilən beynəlxalq qadın forumu ilə dünya qadın liderlərini Bakıya toplayacaq.
- Vaxt ayırıb suallarımızı cavablandırdığınız üçün sizə təşəkkür edir, fəaliyyətinizdə yeni yeni uğurlar, əzmkarlıq və dəmir iradə arzulayırıq!
- Mən təşəkkür edirəm ki, diqqət verib, bizi axtarmısınız. Çox sağ olun.
Söhbətləşdi: Elnur Ağayev
Xeberle.com
Xəbərdən istifadə edərkən istinad etmək vacibdir.
