Vəfat edən Vətən müharibəsi iştirakçısı Səbuhi Məmmədovun kredit borcu ilə bağlı məhkəmə işi açılıb.
Xeberle.com-un məlumatına görə, Səbuhi Məmmədov təxminən iki il əvvəl dəm qazından boğularaq vəfat edib. Onun ölümündən sonra ailəsinə bildirilib ki, mərhum Bank of Bakudan kredit götürüb və təxminən 1000–1200 manat borcu qalıb.
İddialara görə, bank əməkdaşları mərhumun anasına borcun ödənilməsini tələb edib və hətta nalayiq ifadələr işlədərək, "Oğlunuzun borcunu ödəyin ki, o dünyada da narahat olmasın" deyiblər.
Hazırda məsələ məhkəməyə çıxarılıb və işə 1 sentyabr tarixində Şirvan şəhər Məhkəməsində hakim Əli İmanovun sədrliyi ilə baxılacaq.
Qeyd edək ki, 44 günlük Vətən müharibəsi iştirakçısı Səbuhi Məmmədov Prezident İlham Əliyevin sərəncamı ilə "Xocavəndin azad olunmasına görə” medalı ilə, həmçinin Səfərbərlik və Hərbi Xidmətə Çağırış üzrə Dövlət Xidməti tərəfindən "Hərbi vətənpərvərlik tərbiyəsində xidmətlərə görə” medalı və Əmək və Əhalinin Sosial Müdafiəsi Nazirliyi tərəfindən "Təşəkkürnamə” ilə təltif olunub.
Qarşı tərəfin mövqeyini işıqlandırmağa hazırıq.
(Report)
Xəbərdən istifadə edərkən istinad etmək vacibdir.
