Sumqayıt şəhərinin 21-ci mikrorayonunda yerləşən Şəhid Elçin Hüseynov küçəsinin yolları bərbad vəziyyətdədir. Yerli sakinlər artıq uzun müddətdir ki, asfaltlanmayan, çalalarla dolu bu yoldan gileylənirlər. Vətəndaşlar Xeberle.com-a bildiriblər ki, xüsusilə payız və qış aylarında bu ərazi keçilməz hala düşür, nə piyadalar, nə də nəqliyyat vasitələri üçün rahat hərəkət mümkündür.
Sakinlərin şikayətlərinə cavab olaraq Sumqayıt Bələdiyyəsi bildirib ki, hazırda həmin küçədə asfaltlama işləri aparılmır. Bununla belə, qurum küçənin gələcəkdə tədbirlər planına salındığını və perspektivdə asfalt örtüyünün çəkilməsinin nəzərdə tutulduğunu qeyd edib.
Lakin bələdiyyənin bu cavabı sakinləri qane etmir. Xüsusilə də şəhidin adını daşıyan küçənin illərlə baxımsız qalması narazılıq doğurur. Onlar hesab edirlər ki, şəhid adı daşıyan belə küçələrə asfalt örtüyünün çəkilməsi həm vətəndaş rahatlığı, həm də şəhidlərə olan hörmət baxımından vacibdir.
Məlum məsələdir ki, Sumqayıtın bir sıra küçələrində paralel olaraq abadlıq və asfaltlama işləri aparılır. Bu zaman Şəhid Elçin Hüseynov küçəsinin prosesdən kənarda qalması haqlı suallar doğurur: Niyə bu küçəyə hələ də növbə çatmayıb? Və nə üçün şəhid adını daşıyan bir küçənin infrastruktur problemi illərlə həllini tapmır?
Sakinlər aidiyyəti qurumlardan təkcə vədlər deyil, konkret addımlar gözləyirlər. Onlar istəyirlər ki, bu problem tezliklə aradan qaldırılsın və küçə layiqli şəkildə abadlaşdırılsın.
Xəbərdən istifadə edərkən istinad etmək vacibdir.
