28 noyabr 2025-ci il tarixində Azərbaycan Respublikası Əmək və Əhalinin Sosial Müdafiəsi Nazirliyinin tabeliyində Dövlət Məşğulluq Agentliyinin təşkilatçılığı ilə "Gələcəyin Peşələri Sammiti” keçirilib.
Əmək bazarında baş verən dəyişikliklərin, yeni peşə və bacarıq tələblərinin, texnologiya və innovasiya trendlərinin iş dünyasına təsirlərinin müzakirəsi, həmçinin təhsil, məşğulluq və işəgötürən tərəfdaşlığı üzrə yeni yanaşmaların təqdim olunması məqsədi daşıyan sammitdə Mingəçevir Dövlət Universitetinin (MDU) rektoru Anar Eminov da iştirak edib.
Sammitin əsas məqsədi əmək bazarının gələcək ehtiyaclarını proqnozlaşdırmaq, gənclərin karyera planlamasına dəstək vermək, peşə seçiminin düzgün istiqamətləndirilməsini təmin etmək və insan kapitalının inkişafı üçün strateji həllərin müzakirəsinə şərait yaratmaq olub.
Sammitin açılışında Əmək və Əhalinin Sosial Müdafiəsi naziri Anar Əliyev, Milli Məclisin sədrinin arə Heyətinin sədri Orxan Məmmədov və digər dövlət rəsmiləri çıxış edərək əmək bazarında baş verən qlobal dəyişikliklərin ölkəmiz üçün yaratdığı imkanlar, yeni peşə və ixtisaslara artan tələbat, gənclərin gələcək əmək fəaliyyətinə hazırlığının strateji əhəmiyyəti barədə fikirlərini bölüşüblər.
Tədbirdə yerli və beynəlxalq spikerlər tərəfindən bir sıra aktual mövzularda təqdimatlar edilib, panel müzakirələri keçirilib.
Sammit çərçivəsində gələcəyin peşələrinin və kompetensiyalarının müəyyənləşdirilməsi, iş dünyasının yeni tendensiyalarının paylaşılması, təhsil–məşğulluq–işəgötürən əlaqələrinin daha da gücləndirilməsi, əmək bazarının tələblərinə uyğun təhsil yanaşmalarının müzakirəsi və regionlarda da tətbiq oluna biləcək praktik modellərin təqdimatı diqqət mərkəzində olub.
Qeyd edək ki, MDU-nun tədbirdə iştirakı əmək bazarındakı çağırışların daha yaxından izlənilməsi, yeni əməkdaşlıq imkanlarının dəyərləndirilməsi və universitetin gələcək təhsil strategiyalarının formalaşdırılması baxımından əhəmiyyət daşıyır.
Xəbərdən istifadə edərkən istinad etmək vacibdir.
