Bakı–Pirşağı–Sumqayıt dairəvi dəmiryol xətti üzrə bir sıra stansiyalarda NarMobile istifadəçiləri mobil internetin zəif işləməsi, bəzən isə ümumiyyətlə bağlantının olmaması problemi ilə üzləşirlər. Xüsusilə sərnişinlərin çox olduğu pik saatlarda şəbəkənin kəsilməsi gündəlik ünsiyyəti, onlayn xidmətlərdən istifadəni və operativ məlumat mübadiləsini əhəmiyyətli dərəcədə çətinləşdirir.
Mövcud vəziyyət sərnişinlərdə narahatlıq yaradır və rəqəmsal xidmətlərə çıxışı məhdudlaşdırır. Mütəxəssislərin fikrincə, problemin səbəblərinin araşdırılması və stansiyalar ərazisində baza stansiyalarının gücləndirilməsi vacibdir. Əks halda, paytaxt ətrafı nəqliyyat xətlərində rəqəmsal əlçatanlıqla bağlı narazılıqların artacağı istisna edilmir.
Məsələ ilə bağlı "Azərbaycan Dəmir Yolları” QSC ilə əlaqə saxladıq. Qurumun Kommunikasiya departamentinin İctimaiyyətlə əlaqələr şöbəsinin müdiri Bəxtiyar Hacıyev Xeberle.com-a bildirib ki, 2024-cü ilin sentyabr ayından etibarən Bakı, Sabunçu, Sumqayıt, Gəncə, Qəbələ və Ağdam vağzallarında, eləcə də Koroğlu, Bakıxanov, Pirşağı, Goran və Ağstafa stansiya və dayanacaqlarında pulsuz "Wi-Fi” xidməti istifadəyə verilib.
Onun sözlərinə görə, sərnişin rahatlığının tam təmin olunması məqsədilə rayonlararası marşrutlar üzrə hərəkət edən qatarlarda da pulsuz "Wi-Fi” xidməti aktivləşdirilib. Bu imkan xüsusilə səfər zamanı internetdən istifadə edən, onlayn fəaliyyətini davam etdirmək istəyən işgüzar şəxslər və gənc sərnişinlər üçün vacib hesab olunur.
Bəxtiyar Hacıyev əlavə edib ki, Abşeron dairəvi dəmir yolu marşrutu üzrə hərəkət edən qatarlarda şəbəkə keyfiyyətinə təsir edən mövcud məhdudiyyətlərin tam aradan qaldırılması hazırda texniki baxımdan çətindir. Bu isə ixtisaslaşmış GSM-R rabitə örtüyünün olmaması və əlaqənin mövcud GSM standartları əsasında təmin edilməsi ilə bağlıdır.
Qeyd edək ki, məsələ ilə bağlı NarMobile-ə ünvanladığımız sorğu cavabsız qalıb.

Xəbərdən istifadə edərkən istinad etmək vacibdir.