Sumqayıt şəhərinin 21-ci məhəlləsində aparılan söküntü və tikinti işləri sakinlər üçün ciddi problemlər yaradıb.
Xeberle.com-a müraciət edən sakinlər bildirirlər ki, köhnə binaların sökülməsi ilə məşğul olan şirkətlərin istifadə etdiyi ağır tonnajlı yük maşınları məhəllədaxili yolların faktiki olaraq sıradan çıxmasına səbəb olub. Onların sözlərinə görə, asfalt örtüyü müxtəlif hissələrdə parçalanıb, çöküb, bəzi yerlərdə isə tamamilə yararsız vəziyyətə düşüb. Mövcud vəziyyət nəticəsində hətta adi minik avtomobillərinin belə alt hissəsi yola sürtülür, texniki nasazlıqlar yaranır və avtomobillərə real maddi ziyan dəyir.
Məhlə sakinləri qeyd edirlər ki, bu hal artıq sadəcə məişət narahatlığı deyil, həm də təhlükəsizlik və mülkiyyətə zərər məsələsinə çevrilib. Xüsusilə gecə saatlarında və yağışlı havalarda yolun vəziyyəti sürücülər üçün ciddi risk yaradır.
Sakinlər aidiyyəti dövlət qurumlarını məsələyə yerində baxış keçirməyə və söküntü işləri aparan şirkətlərə yol örtüyünün qorunması və bərpası ilə bağlı konkret tapşırıqlar verməyə çağırırlar. Onların fikrincə, yaranmış zərərin aradan qaldırılması birbaşa bu işləri həyata keçirən şirkətlərin məsuliyyətində olmalıdır.
Məhlə sakinləri bildirirlər ki, problemin uzun müddət diqqətdən kənar qalması səssizliyin məsuliyyətsizliyə şərik olması kimi dəyərləndirilə bilər.
Əldə etdiyimiz məlumata görə, ərazidə yeni hündürmərtəbəli binalar tikiləcəyi üçün vəziyyət bu həddə çatıb. Və sonda asfaltlanma işini binaları tələb şirkət həyata keçirməlidir.
Elşən Yəhyayev
Xeberle.com
Xəbərdən istifadə edərkən istinad etmək vacibdir.
