'Ceyranları qoruyaq''

'Ceyranları qoruyaq'' - FOTOLAR

Tarix: 13-06-2015, 13:07 Oxunma sayı: 2 341 Bölmə: Cəmiyyət / FOTO

IDEA (Ətraf Mühitin Mühafizəsi Naminə Beynəlxalq Dialoq) İctimai Birliyi, Ümumdünya Təbiəti Mühafizə Fondunun (WWF) Azərbaycan nümayəndəliyi və Təhsil Nazirliyi Respublika Ekoloji Tərbiyə və Təcrübəçilik Mərkəzi "Ceyranların Qafqazda tarixən məskunlaşdıqları ərazilərə qaytarılması” proqramı çərçivəsində "Ceyranları qoruyaq!” adlı ekoloji yay düşərgəsi keçirib.

Təhsil Nazirliyindən bildiriblər ki, Qax və Şəki rayonlarından 30-dan çox məktəblinin iştirak etdiyi düşərgə iyunun 10-dan 12-dək Qax rayonunun İlisu kəndində təşkil edilib.

Yay düşərgəsinin əsas məqsədi ceyranların reintroduksiya edildiyi ərazilərdə yaşayan gənc nəsli bu növ barədə maarifləndirməkdir. Düşərgə iştirakçıları ceyranların həyat tərzi, yayıldığı ərazilər və təbiətdəki rolu haqqında geniş məlumatlandırılıblar. Uşaqlar, həmçinin müxtəlif kiçik ekoloji tədqiqatların aparılmasında, viktorina və müsabiqələrdə iştirak ediblər.

"Ceyranların Qafqazda tarixən məskunlaşdıqları ərazilərə qaytarılması” proqramı 2010-cu ildən etibarən Ekologiya və Təbii Sərvətlər Nazirliyi, Heydər Əliyev Fondu, IDEA və WWF Azərbaycan nümayəndəliyinin birgə əməkdaşlığı çərçivəsində uğurla icra olunur. Bu illərdə 150 başdan artıq ceyran Şirvan Milli Parkından tarixən məskunlaşdıqları ərazilərə reintroduksiya edilib. Bu ərazilərdə ceyranların daimi monitorinqi və mühafizə işləri həyata keçirilir.

Qeyd edək ki, IDEA İctimai Birliyi, Ümumdünya Təbiəti Mühafizə Fondunun (WWF) Azərbaycan nümayəndəliyi və Azərbaycan Respublikası Təhsil Nazirliyi ətraf mühit və biomüxtəliflik mövzusunda düşərgələri hər il təşkil edir. (azertag.az)