Bir çox qəzetlər də, AzTV-nin öz əməkdaşları da bu qurumda ciddi korrupsiya hallarının olduğunu, sədr Arif Alışanovun neçə illərdir ki, maliyyə pozuntularına yol verdiyini, işçilərin ya maaş almadığı, ya da cüzi əmək haqqının ümidinə qaldığını bildirirlər. Bir yaradıcı qurumun bu qədər kriminallaşması insanda heyrət doğurur. Neçə illərdir bu barədə danışılır, yazılır, tənqid olunur. Hətta, tanınmış televiziya mütəxəssisi, mərhum Elşad Quliyev də bu barədə bir neçə dəfə yazmış, Arif Alışanovun kimliyini adı ilə göstərmişdir. "Exo", "AzadlIq", "Zerkalo" kimi ciddi qəzetlər bu barədə həyəcan təbili çalan materiallar çap etmişlər. Lakin bütün bunlara baxmayaraq, AZTV-də kriminal vəziyyət davam edir. Əlbəttə, bir müsahibin kimlərinsə himayəsindən istifadə edərək kriminal fəaliyyətini davam etdirməsi, bəlkə də təəccüblü deyil, amma ölkədəki indiki gərgin maliyyə şəraitində Arif Alışanovun büdcə vəsaitini ata malı kimi məniməsəməsi, əməkdaşları pulsuz qoyması və dövlət qurumlarının buna göz yumması çox təəccüblüdür. Axı dövlət AzTV-yə hər il 50 milyon manatdan çox vəsait ayırır. Bu pula yaxşı veriliş hazırlaya bilməmələri öz yerində. Amma nəyə görə soruşan yoxdur ki, bu qədər vəsait hara və kimin cibinə gedir? Yəni Alışanova "gözünün üstündə qaşın var demək belə çətindir? Yoxsa torbada pişik var!?

İctimai-siyasi şöbə