"Azəriqaz” İstehsalat Birliyinin (İB) və "Azəristiliktəchizat" ASC verdikləri sözü tutmadılar.
ANS PRESS-in məlumatına görə, noyabrın 23-də istiliyin yaxın zamanda təmin ediləcəyi ilə bağlı "Azəriqaz” İB-nin mətbuat xidmətinin rəhbəri İbrahim Kərbalayev və "Azəristiliktəchizat" ASC-nin şöbə müdiri Rafiq Əliyevin verdikləri söz yerinə yetirilmədi.
Hər iki idarənin rəsmisi qurumlar arasında razılığa gəldiyini və yaxın 2-3 gün ərzində evlərin, müəssisələrin istilik probleminin həll olunacağına söz vermişdilər. Lakin təssüf ki, paytaxt Bakı və ətraf rayon, qəsəbələrdə hələ də istilik sistemi bərpa olunmayıb.
"Azəriqaz” İB-nin mətbuat xidmətinin rəhbəri İbrahim Kərbalayev ANS PRESS-ə açıqlamasında deyib ki, aidiyyatı qurumun borcunun bir qismini ödəcəyi barədə söz verib. Amma hələ də ödəniş olmayıb. "İndiyənədək bizə heç bir qəpik də verilməyib. Borc üstünə borc gəlir. Biz o gündən bəri bəzi qazanxaları qazla təmin etdik. Hətta, borcu min manatdan aşağı olan qazanxanaları açdıq. Başa düşürük, camaat soyuqda qalıb, amma bizi də başa düşün, evlərini kombi ilə isidənlər var, adi qaz sobasından istifadə edənlər var, biz qazı çatdıra bilmərik axı. Heç olmasa, borcun bir hissəsi verilsin, biz də bütün qazanxanaların ağzını açaq".
İbrahim Kərbalayevin sözlərinə görə, "Azəristiliktəchizat" ASC-yə yay aylarından bəri xəbərdarlıq edilib ki, 2011-ci ildən yaranan borclarını ödəsinlər. Amma onlar bəzi saytlarda yanlış məlumat verərək, deyirlər ki, onlardan 2011-ci ildən öncə olan borclar tələb edilir.
"Azəristiliktəchizat" ASC-nin şöbə müdiri Rafiq Əliyev isə məsələyə münasibəti belə bildirdi: "Biz lazım olan addımlar atdıq, hər yerə də sənədlər təqdim etdim, indi də "Azəriqaz” İB-nin addımını gözləyirik. Düzdür, həftənin əvvəli bəzi qazanxanaları açdılar, amma sonradan yenə qaz verilişi dayandırıldılar".
Onun sözlərinə görə, istilik verilmədiyi müddətdə əhalidən xidmət haqqı da tələb edilməyəcək. İstilik nə zaman olarsa, kommunal haqq da o zamandan hesablanacaq.
Hazırda ölkə üzrə 535 qazanxanadan 291-i işləyir. Bakıda 340 qazanxanadan 126-sı, regionlarda 195 qazanxanadan 165-i işlək vəziyyətdədir. Amma nəzərə alaq ki, söhbət orta və kiçik həcmli qazanxanalardan gedir. Bakıda 3140 binadan isə cəmi 632-nə istilik verilir.
Görünən budur ki, borc üstündə iki qurum arasında söz-söhbət hələ uzun çəkəcək. Onlar hələ uzun müddət borc davası edəcəklər. Bir neçə gündən sonra qış fəsli gəlir. Borc davası deyəsən, bu il əhalinin canını isinməsinə imkan verməyəcək.
Xəbərdən istifadə edərkən istinad etmək vacibdir.