"Ünvanı soruşan insanlara, buraya gələn qonaqlara kitabxananın yerini izah etməkdə çətinlik çəkirik”
Bu günlərdə Səməd Vurğun adına Sumqayıt Mərkəzi Kitabxanasının ətrafında olan, oxucuları və kitabxana əməkdaşlarını xeyli vaxtdıröz səs-küyü ilə narahat edən avtoyuma məntəqəsi və bəzi digər obyektlər söküldü.
"Qeyd etmək istəyirəm ki, mərkəzi kitabxananın Abonement, Oxu zalı, Komplektləşdirmə və kitabişləmə, Kitabxana-biblioqrafiya proseslərinin avtomatlaşdırılması şöbələrinin, həmçinin MKS direktorunun pəncərələri sözügedən obyektin fəaliyyət göstərdiyi əraziyə baxır. Buna qədər hay-küylü iş rejiminin yaratdığı narahatlıq səbəbindən oxucular və biz kitabxana əməkdaşları dəfələrlə şikayət etsək də, konkret tədbir görülmürdü. Məhz buna görə də kitaba, kitabxanaya dəyər verən şəhərimizin icra başçısı Zakir Fərəcovun bu qəti addımını yüksək qiymətləndirir, kollektiv adından təşəkkürümüzü bildiririk.”Bu sözləri Xeberle.com-a açıqlamasında Səməd Vurğun adına Sumqayıt Mərkəzi Kitabxanasının direktoru Yeganə Əhmədova deyib. Y.Əhmədova bildirib ki, həmin söküntü işləri ilə narahatlıq yaradan obyektlər aradan götürülüb, amma kitabxana işçilərinin və oxucularımızın daha bir problemi də var. Direktor qeyd etdi ki, kitabxananın qarşısında tikilən nəhəng görkəmi ilə seçilən obyektin də yerində tikilmədiyi göz qabağındadır: "Öz nəhəng görkəmi ilə çalışdığımız S.Vurğun adına Mərkəzi kitabxananın qarşısını kəsib. Şəhərimizin ən böyük təbliğat, mədəniyyət müəssisəsi tamamilə kölgədə qalıb. Xatirinizdədir yəqin ki, kitabxananın reklam lövhəsi həmin tikilinin yerində idi. İndi isə bizdən ünvan soruşan insanlara, kitabxanaya gələn qonaqlara bunu izah etməkdə çətinlik çəkirik.”
Xeberle.com
P.S. Fotoda kitabxananın qarşısını kəsmiş həmin obyektin köhnə - tikilən dövrdə olan əksidir.
Xəbərdən istifadə edərkən istinad etmək vacibdir.